O le sainia ai o le maliega ma le malo o Singapore i le amataga o le vaiaso nei ua fuafua e tatala ai le avanoa e mafai ai ona agai mai malaga tuusa’o a vaalele mai lea atunuu i Samoa.
O le faia o lea tulaga ua valoia ai le anoanoai o itu lelei mo fefaatauaiga, o le atinae o turisi, o le sootaga lelei ma lea atunuu faapea ai le fefaasoaa’i i tu ma aganuu.
O loo i Singapore le Alii Minisita ia Olo Afoa Fiti Vaai ma lana aumalaga mo le faamoemoe e auai i le fonotaga lona tolu a Minisita o Femalagaa’iga a Singapore ma le Pasefika.
I le mae’a ai o le tatalaga o lea fono na saini ai loa le maliega lenei mo le tatala ai o le auaunaga i le ea i le va o malo e lua.
O le saunoaga a le Alii Minisita na ia faailoa ai ua lē na o se sainigalima lenei tulaga ua faia ae o le alalaupapa lea i le va o atunuu e lua, ma mo Samoa lava ia o se fiafiaga i avanoa lelei o le a aumaia e femalagaa’iga nei ua tatala e lē gata mo tagata ae mo le tamaoaiga o lo tatou atunuu.
E tolu ni faamoemoe e faatatau lava i femalagaa’iga o loo valaaulia ai Samoa e ala i le alii Minisita ma le aumalaga ma ua mafai ona auai iai lo tatou atunuu ona o le agaalofa mai o le Matagaluega o Femalagaa’iga a Singapore.
