O le Aso Faraile o le vaiaso nei le aso 3 o le masina o Ianuari o le tausaga fou 2025 o le a auai atu ai le ta’ita’i o le Malo le afioga i le tamaitai Palemia, Afioga Fiame Dr Naomi Mataafa i le sauniga e faatauto ai le Kovana Sili ma le Lutena Kovana filifilia o le faigamalo a Amerika Samoa.

O ta’ita’i filifilia fou o le faigamalo a Tutuila ma Manu’a o le afioga Pula Nikolao Pula i le tofi Kovana Sili ma le afioga Pulu Ae Ae Jr i le tofi Lutena Kovana.

O le masina o Novema o le tausaga nei na filifilia ai i la’ua i le faigapalota a Amerika Samoa, ma ua lē manuia ai le toe finau atu o le Kovana Sili ma le Lutena Kovana o loo iai nei mo le isi fā tausaga o le la nofoaiga, le afioga Lemanu Palepoi Sialega Mauga ma le afioga Laapui Talauega Eleasalo Ale.

O le auai atu o le tamaitai Palemia i lea sauniga mamalu ma taualoa o le a maua ai le avanoa muamua e feiloa’i atu ai i le Kovana Sili ma le Lutena Kovana ua tusi aao iai Tutuila ma Manu’a mo le fā tausaga muamua o le la nofoaiga.

E iai le talitonuga o se avanoa faaauro foi lea e feiloai ai ta’ita’i o faigamalo a o loma ai se aso o le fono o le Atoa o Samoa.