Ua folasia i taualumaga a le faamasinoga sili i le amataga o lenei vaiaso le finauga faaletulafono ua lu’i ai e le afioga Fepuleai Attila Ropati, sa seei i le tofi Peresetene o Faamasinoga o Fanua ma Suafa, le faaiuga a lea lava faamasinoga na teena ai lana talosaga mo se poloaiga e ta’u solitulafono ai ma soli faavae, le aveesea o ia mai lea tofiga.
O loo ia toe apili le faaiuga peitai ua faaulu se tali tetee a le Loia Sili a le Malo faasaga i lea talosaga apili, ma ua faatulaga o le a iloiloina pe a faamautu se aso e tauaofia ai le faamasinoga o talosaga a le faamasinoga maualuga i le tausaga fou.
O loo iai foi se isi ana talosaga mo se iloiloga faaletulafono poo se judiciary review, lea o le a tapena iai se tali a le Loia Sili ma toe fofogaina ai lea talosaga i le aso 30 o Ianuari o le tausaga fou 2023.
O le alii loia le susuga Sefo Ainuu o loo tulai mo le su a le itu tagi, o loo faasaga i le Loia Sili a le Malo e avea ai ma sui o le afioga i le Palemia.
