O se faaaloalo maualuga mo le Faiaoga, le pulega ma tama o le aulakapi taitoafitu a le Manu Samoa le auai i le faamanatuina o le atoaga o le 70 tausaga o le soifua o le faauluuluga o le Ekalesia Katoliko o le Puleaga a Apia Samoa ona o se valaaulia a le Aki Epikopo le afioga Alapati Lui Mata’eliga.

E le gata o le faailogaina o le aso soifua o le Aki Epikopo, ae sa faailoga ai foi ma le atoaga o le 45 tausaga talu ona ia tauave le tofi ositaulaga i le galuega faa-Pelepitelo ma le 20 tausaga o le tofiga Episcopal o le Ekalesia Katoliko.

O le vaiaso nei foi na valaaulia ai e le afioga i le Tui Atua Tupua Tamasese Efi sa avea ma Ao o le Malo le aulakapi taitoafitu, mo sana upu faafetai ma le faamalo ma momoli ai foi se faamalosiau mo isi taaloga o loo totoe.

Ua ave ai le faafetai a le pulega, ma le faiaoga i ia taitai iloga o le atunuu i le nofo tatalo ma tapuaia o latou faiva.

I se tala mai le taamilosaga volipolo o le Trans Pacific Challenge Cup o loo faagasolo i Aukilani lea o loo tausinio ai le auvolipolo o le Knights mai Vaitele fou ma le I’a Sa mai Lusoalii i Luatuanuu, ua lua taaloga a le I’a Sa ae tolu taaloga a le Knights e manumalo uma.

O le vaega o le Division one o loo tausinio ai ‘au mai Samoa e 12 auvolipolo o loo taaalo ai. O le aso 2 o Ianuari na amata ai le taamilosaga ae mae’a i le faaiuga o lenei vaiaso.