O tupe sa faaaogā i le taimi o le malo tausi poo le caretaker government e tusa ma le 250 miliona tālā, ma tupe sa faaaogā i le fuafuaga faanatinati tau tupe a le malo i le taimi na see atu ai le faigāmalo fou e tusa ma le 56 miliona tālā, ua faasee atu nei i le ofisa o le su’etusi a le malo mo le faia o le galuega faasu’etusi i le faaaogāina o ia tupe a le malo o lona tuuaofa’iga e 306 miliona tālā.
Ua faailoa lea laasaga ua faatino i le faaaogāina o ia seleni a le malo e le tama’ita’i Minisita o Tupe le afioga Mulipola Anarosa Ale-Molioo i se lipoti a le Talamua, ma ia faailoa ai foi, e ulufale le malo fou i le aso 16 o Setema ua toe tasi le vaiaso o loo totoe o tupe faaalu i totogi o tagata faigaluega a le malo mai le taimi o le malo tausi.
Ua faailoa lava e le Minisita o Tupe i lea lipoti o le lē maua o totogi ma itula faasili poo ovataimi o nisi o tagata faigaluega a le malo talu ona pasia le tala autū o le tupe, o se tulaga e pa’ū i matāgaluega a le malo ma i latou o vaaia.
