E silia ma le 300 tagata faigaluega a le matagaluega a le soifua maloloina poo le Te Whatu Ora o le a vāea, e ese ai le isi faitau selau o le a faatofa mai foi i nai vaiaso o i luma.
Faamaoniga lea mai le pule sili Margie Apa e tusa ma le faaiuga o le a vaea ai tagata faigaluega full time e 322.
O lea aofai e leai ma se tagata faigaluega frontline clinical o lavea ai poo i latou nei e feagai ma gasegase peitai e foliga mai o i latou nei ua taitoalua pe sili atu foi tagata e faia le galuega e tasi, mafua mai i le taimi na tuufaatasi uma ai pulega faaitumalo a le soifua maloloina poo le 20 district health boards sa iai muamua ao lea ua Te Whatu Ora.
O le suiga o lea ua atoa le tausaga talu ona iai ma o se suiga foi ua sau ai faamaumauga ua faasao mai le $75 miliona a le matagaluega i lenei tausaga.
E lē o mautinoa mai pe fia sa’o le fuainumera o isi tagata o le a vāea i vaiaso a sau.
