O le kamupani vaalele a le Fiji Airways ua mae’a togipau auā le faimalaga atu ai o le ‘au a Samoa mo faagatama o taaloga o le Pasefika lea o le a faia i Solomona.
Saunoa le Peresitene a le Samoa Association of Sports and National Olympic Committee (S.A.S.N.O.C.) Pauga Talelei Pauga e tusa ai o le aofaiga o le seleni o loo faaaluina i lenei faamoemoe.
“Pe tusa ma le $1.1 miliona le tau aofai ua mae’a totogiina mo malaga togipau nei e malaga ai le tatou autaaalo.
“O le agaga lava ia sa autilotilo i se auala taugofie ma faafaigofie o lea la ua iai a tatou vaa togipau e taugofie toe puupuu foi le taimi e na o le 4 itula e alu sa’o ai mai Samoa i Solomona.
“Tusa e tolu vaa e malaga e tolu foi vaa e malaga mai o vaa e tai 150 e mafai ona ofi ai lona uiga ua lava lea ma totoe mo le tatou aumalaga.
“O le malaga muamua e fuafua e tuua Samoa i le aso 15 o le masina nei ae o le isi malaga o le aso 19 mo taaloga o le a faagasolo i le vaiaso muamua a mae’a ona toe malaga mai lea i le vaa ae avatu le isi vaega i taimi o a latou taaloga.”
O le malaga mulimuli e toe auina mai ai le autaaalo o le a feagai ma taaloga i le vaiaso mulimuli o loo fuafua lea e toe taliu mai i le aso 4 o Tesema.
O le agaga ma le faafetai i le Malo mo le fesoasoani mo le faatupeina o lenei faamoemoe.
