O le fesoasoani a le Faamalu o faalapotopotoga tuma’oti poo le Samoa Umbrella for Non-Governmental organization (S.U.N.G.O.) mo tina ma tamaitai ina ia unaia pea lo latou sao ma le faalauaiteleina o le tomai ma le agavaa.
O galuega faatino a le S.U.N.G.O. o loo mafai ona faatupeina lea e se tasi o polokalame ua ta’ua o le EU and UN Spotlight Initiative Samoa Country Program e tauala mai i le faalapotopotoga o Atinae a Malo Aufaatasi le United Nations Development Programme (UNDP).
O lenei fesoasoani o se faigapaaga a Malo Aufaatasi ma le Iuni a Europa ina ia tafiesea ai ituaiga sauaga eseese faasaga i tina ma tamaitai.
O le S.U.N.G.O. o loo taimua i le faafoeina ma faatino nei vaega e unaia ai le sao o tina ma tamaitai aemaise lo latou leo ina ia faatāuaina i totonu o aiga, afioaga ma soo se potopotoga.
O nei galuega faatino e aofia ai aoaoga i taitaiga lelei e unaia ai tina ma tamaitai i tomai ma agavaa faataitai, o fuafuaga ma alafua aemaise o le faia lea o faaiuga tatau ma lelei.
O nisi o galuega faatino o le aoaoina lea o le tomai i faiga faavae ma faalauiloa avanoa tutusa ma le faasoaina lea o manatu ma lagona ina ia mafai ona galulue faatasi ai.
O le faafetai a le S.U.N.G.O. i le fesoasoani a lenei polokalame mo le lagolagoina o ana galuega faatino ina maua pea se siosiomaga saogalemu o tina ma tamaitai ma o loo tumau pea le galulue faatasi ai ma nisi o vaega o le Malo aemaise nuu ma afioaga ina ia mafai ona tuuina atu lo latou tau’au e fesoasoani.
