Ua unaia nei e sui mai le soifua maloloina tagata ina ia faia tuipuipui e puipuia ai mai se tasi o siama poo se faamai foi e faaigoa i le faaperetania o le Tetanus poo le ‘ona e faalogoina ai le tiga o maso o le tino ma aafia ai nerves.
Fai mai le lipoti i le asō i le 9News o se tina pe ā ma le 80 tausaga na maliliu i le mae’a ona aafia i le siama lea mai se tamai manuaga sa iai i lona vae sa ulufia i se palapala mai le togalaau e pei ona ta’ua i faamatalaga na lipotia ane e le NSW Health.
Fai mai e toalua isi tina, o le isi pe ā ma le 80 a o le isi i le 70 ma ona tupu tausaga na aafia foi i le tulaga lava tali faapea foi e feta’ua’ina ai le ‘ona, o le toalua o tina nei e lei faia lava se tuipuipui o le ‘ona a o le isi tina ua silia ma le 30 tausaga e lei toe faia se isi ona tuipuipui.
Fai mai le fomai o Christine Selvey mai le vaega o gasegase pipisi i le NSW Health o le ‘ona o se faamai e seāseā vaaia peitai e ogaoga ona aafiaga ma o le faia o le tuipuipui o le puipuiga sili lea.
Fai mai i Ausetalia e matele ina aafia ai tagata matutua aemaise lava le itupa o tamaitai e le o lava pe faia foi ni tuipuipui.
