O loo suesue e leoleo se faalavelave ua lipotia le uma ai o le ola o se fanauiti i le vai taele poo le swimming pool o le faletalimalo o le Aga Reef Resort i le agai i le atu Aleipata.

E lē o mafai ona maua ni faamatalaga o le faalavelave mai leoleo ae sa avatu faanatinati lē ua aafia le ola i le falemai e lata ane i Lalomanu peitai na siliga tali i seu taumafaiga a foma’i ma nisi o le aufaigaluega a le faletalimalo e faasao le ola o le tamaititi.

Ua faailoa e le pulega o le faletalimalo i se pepa o faamatalaga faalauaitele, e lagona le faanoanoa alofa i le fano o se ola o se tasi o le fanau, ae o le faamuamua o loo pito tu maualuga i le auaunaga a le Aga Reef Resort o le saogalemu o ana malo e afea le nofoaga mo tafaoga ma malologa.