Tala faanoanoa na faalogoina i Sini i le taeao nei ina ua faamaonia ua uma le ola o se tamaititi i totonu o se taavale ma e talitonuina sa tata’e e lona tamā le faamalama pito i tua o le taavale e taumafai ai e faasao si ona atalii sa i totonu o le taavale ua matuai vevela lava.
O lipoti mulimuli nei o lea mataupu ua faailoa ai ua faamatuu mai e leoleo le tamā lea i le mae’a o suesuega sa faia ma e leai se moliaga ua faia.
O le 7News o loo ta’ua ai na valaau ane le fesoasoani faavavave i le Railway Parade i Glenfield poo le ta o le 3 i le aoauli ananafi ina ua maua se tamaititi 3 tausaga mai totonu o se taavale na taumafai atu si ona tamā e faia iai galuega laveai peitai e lei manuia ma uma ai lava lona ola i lea nofoaga.
Ta’ua e le lipoti o lē e ana le taavale, e masani foi i le tamaititi na ia faailoa le mea ua tupu ina ua oo ane i le taavale.
O loo ta’ua foi se faamatalaga a le tamā o le tamaititi e faapea ua galo ia te ia o loo iai lona atalii i le taavale ina ua ia faapaka le taavale ma agai atu i lo latou fale.
O ananafi na oo atu i le 31 tikeri le vevela o le faaitu lea i le taimi lea sa iai si tamaititi i le taavale ma ua toatele ua faaoo ane alofaaga ma faamaisega mo sia tamaititi ma toe tuuina mai ai ma se faamanatu a le NRMA i matua ma soo se tagata ia manatua ia aua le tuuina na o tamaiti poo ni meaola foi i totonu o taavale aemaise lava i le tau mafanafana.
