O le asō ua lipotia ai le ono iai o le uluai tagata i Ausetalia ua aafia i le monekypox, o se tagata na malaga i Europa ma toe foi mai. O lea alii pe ā ma le 40 tausaga e pei ona faailoa e le 7News e faapea na faalogoina le aafia i le tau lē lava o le mānava ina ua toe foi mai i Sini e pei ona faailoa e le soifua maloloina mai Niu Sa Uelese.
Na agai i le foma’i e siaki ma o loo iai āuga o le monkeypox ma faia ai loa suesuega lea ua faailoa mai i le asō o loo iai i se tulaga e foliga mai o lea ituaiga faama’i a o tālia ai isi tests o loo faia. O lē ua aafia o loo faanofoesea i le fale ma se isi latou te aumau faatasi ma o loo fesoasoani iai lana GP ma le matagaluega o le soifua maloloina.
Fai mai le ofisa sili o le soifua maloloina i Niu Sa Uelese, Dr Kerry Chant o le monkeypox o se viral infection e seāseā maua ma e le faigofie foi ona pepesi i tagata ma e tele foi ina aafia ai tagata e iai fagafao pets. Fai mai e masani lava e lē gasegase tele ma o le toatele e aafia ai e toe malolosi lava i ni nai vaiaso.
O loo ta’ua i le lipoti e taatele lava i atunuu e pei o Central ma West Africa ae i nai aso ua tuanai atu sa lipotia mai ai i Amerika ma isi atunuu Europa. O āuga e aofia ai le fiva, tiga o maso o le tino, mageso aemaise lava i foliga, faamaalili ma lēlavā ma e tai pei lava foi o le chickenpox poo le tanesusu e pei ona faaigoa ai i Samoa.
