O lenei ua lolomi nei le igoa o le tamaitai o Faith Vui i le talafaasolopito o le taaloga o tagapolo (golf) i Niu Sila, o ia le uluai Samoa ua manumaloina lenei taamilosaga suega siamupini i le vaega o tamaitai tau amata i Niu Sila, le NZ Women’s Amateur Championship.
Na manumalo Vui i le 36-hole final i le Hamilton Golf Club – St Andrews Course 5&3 ia Amy Im.
O le tamaitai o Faith Vui e galulue faatasi lava ma si ona tamā o Gary Vui, o lona faiaoga foi lea e taumulimuli ai lava i taaloga a lona afafine.
Na manumalo Vui ia Teresa Wang, Sumin Kang, Suwanna McPhee, ma Chloe Lam ma oo atu ai i le tulaga ua tauva ai i le tauvaga faaiu.
O le moemitiga a Vui, ia oo mai le aso o le a laa atu i luga i le vaega o taaloga faapolofesa, ma o lona manumalo ai i le vaega amata i le vaiaso talu ai, ua aumaia ai ia te ia se faamalosiauga ma se faamautinoaga, e mafai lava e se tamaitai talavou mai Samoa ona faatino lenei taaloga i fola sili ona maualuluga i le lalolagi.
O Faith Vui e taalo mai le kalapu a le Royal Samoa Golf Club i Samoa.
O loo sauni atu foi Faith ma lona tuagane o Leo e fai ma sui o Samoa i le taaloga o le golf i taaloga a le Pasefika lea o le a faia i le Atu Solomona i le masina nei.
