O le tausaga e 2023 ina ua iai se finagalo o le afioga i le Pelesetene o le Faamasinoga o Fanua ma Suafa e filifili ni faamasino e avea ma Pelesetene lagolago, sa mātauina ai e leai se ta’iala e avea ma faasinoala i le faia o se filifiliga.
Na faailoa e le Pelesetene le afioga Lesatele Rapi Vaai ina ua faalauiloa le ulua’i faavaa o ta’iala e mata’itū ai galuega a faamasino o lea faamasinoga, a lelei lava le milimili a le faamasino i le Pelesetene i tausaga ua tuana’i o le faamasino foi lena e filifilia e avea ma Pelesetene lagolago.
O lea la ua faataoto nei le faavaa o ta’iala ma ua aiaia ai manulauti, o ta’iala faavae, o iloiloga o le faatinoga o galuega a faamasino, faapea ma ta’iala e siitia ai tulaga o faamasino i tofiga i luga atu e pei o Pelesetene lagolago.
E oo lava i le toe iloiloina o le auaunaga faaauau a se faamasino ua ausia tausaga litaea e mālōlō ai ua iai foi le ta’iala e faatino ai lea tulaga.
E faapena foi le faauluina o ni faaseā i faamasino, ua lima ta’ita’iina foi le tauaveina o lea tulaga i ni ta’iala ua faataoto i le faavaa e iloilo ai galuega a faamasino o le Faamasinoga o Fanua ma Suafa.
O le masina fou e faatauto ai faamasino e to’afā ua filifilia e le komisi o lea faamasinoga ma ua talafeagai le amata faatino o o latou tofiga i le masina fou o Aperila ma le mae’a fausia o lea faavaa o ta’iala.
