Ua vave faamavae mai Stuart Nash ae o le mea sa’o o le tuli.

O le tali mai lea a le Palemia, Chris Hipkins i le faamavaega a lē sa avea ma minisita o leoleo, Stuart Nash lea na ia talanoa i le komesina o leoleo Andrew Coster o ia foi o se faauo a le minisita e faatatau i le toe apili o se tasi o faaiuga a le faamasinoga.

I maliega o tofiga nei, e matuai faasā ona faalavelave fua minisita i galuega ma e le gata o loo matuai manino i le tusi tulafono a le Kapeneta ae faapea le tulafono lea o loo ta’ua ai e le mafai ona talanoa i faaiuga o faamasinoga poo suesuega o soligatulafono.

Na saunoa le Palemia ananafi, e faanoanoa i le mea ua tupu ma e sese le faaiuga a le minisita na fai, ma ana faapea e le faamavae mai o le iuga e tuu atu iai o le faamalolo.

A o talanoa ai le Palemia i le faamalolo, e na o le tasi le tofiga minisita ua aveesea mai ia Stuart Nash, ae o lea lava e avea ma minisita o faatoaga ma faigafaiva faapea le vaega o atinae.

Ua fai mai ai le National, ua faaaoga sese e Nash lona malosiaga faaleminisita ma e le tatau ai ona toe minisita o le Kapeneta.

Ae na ta’ua e David Seymour o le ACT, o lea na faalavelave i galuega a leoleo, alu toe faasalalau faapea ai ma le lē faatoese ma ua tatau ona tuli motu.

Ua toe pisi nei le Palemia e sue se isi ana minisita o leoleo a o tauave ai e Megan Woods mo le taimi nei.

Ae na ta’ua e le komesina lea na vili iai le minisita, o la laua talanoaga ua o se telefoni atu o Nash e peiseai e masua atu lona le fiafia i le iuga o le faamasinoga ma e ui na ta’ua ai le apili, ae lei faapea a mea na faatalosaga atu le minisita poo lana uo ia Nash e unaia o ia e faila se apili.