Fuimaono Dr Dylan Asafo
Fuimaono Dylan Asafo

Ua na’o le loto toa e mafai ona taofi ai le pule sauā i Samoa.

Ua tuuina mai se manatu a le alii faiaoga Samoa i mataupu tau i le tulafono i le Iunivesite Aukilani Niu Sila ia Fuimaono Dylan Asafo e faatatau i le poloaiga a le Ao o le Mālō lea na fai i le amataga o le vaiaso.

Ta’ua e Fuimaono o le poloa’iga a le Ao o le Mālō ina ia tauaofia le Palemene i le Aso 2 o Aukuso e matuā solifaavae ma e lua mafuaaga manino ua ia tuuina mai.

Muamua o le manatu a Fuimaono o le faamalamalamaga o le poloa’iga a le Ao o le Mālō e faapea e le o mautinoa poo ai le vaega faaupufai e toatele le aofa’i e fausia ai se faigamālō e matuā sese lava.

O loo manino le 26 sui o le  o le FAST ae 23 le HRPP (lea ua 21 i le taimi nei ona ua faalēaogaina leisi a latou nofoa).

O lea la o le poloaiga a le Ao o le Mālō o se gaioiga e faasalalau ai faamatalaga sesē ma lafo ai masalosaloga i le aloa’ia o le fuainumera o le FAST ma le i’uga o le faigapalota na faia i le Aso 9 o Aperila 2021.

Lona lua e leai se malosi’aga faatapulaaina a le Ao o le Mālō e valaau ai le tauaofiaga o le Palemene i soo se taimi e malie ai lana afioga, ae o le mea moni o malosi’aga uma a le Ao o le Mālō e noatia i nisi o tapulaa tāua ma aiaiga o loo tā’ua i le faavae.

E tusa ai ma le malosi’aga a le Ao o le Mālō e valaau ai le tauaofiaga o le Palemene – o lea malosi’aga o loo tā’ua mai i le vaega 52 o le faavae ma e faapea:

52. Fonotaga a le Fono Aoao Faitulafono: O le a usuina le Fono Aoao Faitulafono i ni taimi ma ni nofoaga e pei ona atofaina e le Ao o le Mālō mai lea taimi i lea taimi mo lea itu i se faaaliga e lomia i le Samoa Gazette ma faamauina i le Sāvali:

AE AFAI E FAAPEA o le a usuina le Fono Aoao e le i tua mai o le fasefululima aso ina ua uma le faiga palota aoao ma ia le itiiti i le faa-tasi i totonu o tausaga taitasi uma, ina ia leai se vaitaimi e sefulu-lua masina e i le va o le fonotaga mulimuli a le Fono Aoao i totonu o se tauaofiaga e tasi ma le fonotaga muamua a lea lava Fono i le tauaofiaga e sosoo ai o lo o lumana’i.

Tā’ua e Fuimaono, “o lea vaega o loo manino mai ai e oo lava i le Ao o le Mālō e leai sona malosi’aga e valaau ai le nofoaga ma le taimi mo le palemene ina ia tauaofia, faato’ā mafai lava ona faaaogā lona malosi’aga lea i le aiaiga ina ia faia i totonu o le 45 aso i le māe’a ai o le faigapalota”.

Faailoa e Fuimaono, “ua silafia uma na faia ma le mautinoa le gaioiga a le Ao o le Mālō e solia ai le vaega 52 o le faavae ae o lona lava loto na lē auai ai i le fono i le Aso 24 o Me 2021 lea na ia poloa’ia muamua i le Aso 20 o Me 2021”.

Na toe tā’ua e Fuimaono, “o lea la, talu ai ona ua faalagolago le Ao o le Mālō (faauiga sesē) lea vaega o le faavae lea ua ia solia e faailoa mai ai le telē o le faaletonu ma le popolega. E faalia mai ai le manino o lona lē amanaiaina ma talitonuga sesē e faapea o ia e maualuga atu i le tulafono. Ae ui i lea ona o Samoa o le atunuu faatemokarasi ma lona faavae, e le mafai e le Ao o le Mālō ona filifili poo gafea tonu o laina o le faavae o loo ia mana’o e mulimulita’ia, ma e le mafai ona faafoliga mai e le’o iai isi fuaiupu o le faavae (faamatala ai le aiaiga faatapulaa a lona malosiaga)”.

Tā’ua fo’i e Fuimaono i le saunoaga a le Ao o le Mālō e faapea, ” E leai se pule a le faamasinoga e faatonuina ai le tauaofiaga o le Palemene aua o a’u, le Ao Mamalu o le Malo o Samoa e iai le malosiaga e e filifili ai le taimi ma le nofoaga e faia ai le fono aoao a le Palemene”.

Talitonu Fuimaono e matua’i sesē ma e fuafuaina ae le’o lenā e faatauanau ma e faailoa sesēina ai le faatulagana o se faavae faatemokarasi. O nei faatulagana e faapea o le galuega faale faavae a le faamasinoga e faamatala ma faaaoga le faavae (vaega 73(1) ma e taofi Pulega faatonu (aofia ai ma le Ao o le Mālō) pe afai e solia le faavae ma faaleaga le malosi’aga o le Palemene poo le faamasinoga.

O lenei gaioiga e taua i le taofia ai o le tula’i mai o se faigamālō le faamaoni ma le pule sauā.

O lea la e pei ona ta’ua e Fuimaono ona o le solia ai e le Ao o le Mālō o le vaega 52 o le faavae e telē le aia tatau a le faamasinoga (o le mea moni o le galuega faatulafono) e faamatala ai ma faauiga le faavae, lagolagoina le poloaiga a le Ao o le Mālō na fai i le Aso 20 o Me 2021 (lea e o gatasi ma le vaega 52) ma faatonuina loa le Palemene ina ia fono i totonu o le 7 aso.

Tā’ua e Fuimaono e taua tele le faailoa o le faaaloalo o le Faamasinoga maualuga ma le Faamasinoga toe iloilo poo le Faamasinoga apili na tuu atu i le Ao o le Mālō e oo mai i le taimi nei. E le gata e lei taofia le Ao o le Mālō ona o ana gaioiga solifaavae ae na mata’ituina lelei gaioiga tauala atu i le vaivai o le faufautua a le Ofisa o le Loia Sili ae le gata i lea o i latou o loo fautuaina le Ao o le Mālō.

Ae ui i lea mo le puipuiga o Samoa ma lona mālō faatemokarasi o lea faaaloalogia ma le puipuiga ua tatau ona taofia loa. Ta’ua e Fuimaono “o le taimi lenei mo le faamasinoga ae faapitoa lava tagata Samoa ina ia tula’i ma faaali le loto toa faaaga i gaioiga pule sauā a le Ao o le Mālō, Tuilaepa, le HRPP ma le ofisa o le Loia Sili”.

I le manatu o Fuimaono o nisi o gaioiga toa ma le lototele e tatau ona faaali e aofia ai

1. O le faaiuga a le faamasinoga i le aso 28 o Iuni 2021, ua tatau nei i le faamasinoga ona faaaoga le faatautoga o le Aso 24 o me 2021 i lalo o le Doctrine of Necessity ma faamautinoa ai le tula’i mai o le FAST ma faigamālō aloa’ia a Samoa. Ta’ua e Fuimaono e mafai ona fai e le faamasinoga lea tulaga e ala lea i le teena o nisi gaioiga a le Loia Sili ma isi e apili ai le faaiuga a le faamasinoga o le Aso 28 o Iuni 2021, pe e mafai ona fai mulimuli i le faamasinoga toe iloilo pe afai e taunuu se talosaga apili. Ta’ua foi e Fuimaono e tatau i le faamasinoga ona talosagaina le fesoasoani a ta’ita’i o atunuu i fafo e pei o Niu Sila, Ausetalia ma le Pasefika atoa ina ia amana’ia le aloa’ia ai o le FAST ma faigamālō a Samoa ma faailoa ai Samoa o se atunuu tutoatasi.

2. O le Samoa Law Society ma ana paaga na ta’ua e Fuimaono e tatau ona aumaia faasalaga faasaga i le Loia Sili ma nisi lava loia o le ofisa ona o le amio lē pulea i lalo o le Tulafono o Loia ma faatinoga o galuega faa Loia 2014. O nei amio lē pulea ua manino ai le lē faataunuuina o le faufautua i le Ao o le Mālō ma isi ina ia mulimulita’ia faaiuga a le faamasinoga na tuuina mai i le Ao 28 o Iuni 2021. Ta’ua foi e Fuimaono o le gaiogia a le Loia Sili e lē amanaia ai le faamasinoga, le faavae ma le tulafono o le tali e tatau ona faaleaogaina ai i latou.

3. Tā’ua e Fuimaono i se tami vave lava e tatau ai i tagata Samoa ona valaau i le faigamālō a le FAST ina ia aveese le Ao o le Mālō mai lona tofi i lalo o mafuaaga o le “amio lē pulea” i lalo o le vaega 21(1) o le faavae. Ta’ua foi e Fuimaono ua oo i le taimi mo tagata uma e talia ai ua fetuunai e Tuimalealiifano Vaaleto’a Sualauvi II le mamalu ma le aloaia o le Tofi ma le ofisa o le Ao o le Malo o Samoa. Na ia ta’ua o lenei talosaga ina ia aveese le Ao o le Mālō e le’o se gaioiga e faapea e faafefe pe tuu atu i se auala palapalā faasaga i le Ao o le Mālō peitai o se manatu ua tatau ona faatino e amanaia ai le lē manuia , ae le’o lenā o le mata’utia o le tulaga ua iai le Ao o le Mālō i le taimi nei.

4. Faailoa e Fuimaono o gaioiga uma e faatino mo le filemu ma aloese mai i ni feeseesea’iga poo fetaua’iga, ma afai ae manaomia le puipuiga a leoleo ina ia fesoasoani i le FAST mo se auala e tauaofia ai le Palemene e tatau ma onomea i lalo o le faavae.

I le vaega lona 5 o le Tulafono o Galuega tau Leoleo 2009 o loo ta’ua ai:

5. A o lumana’i ai le faafoeina o le tautoga i lalo o lenei fuaiupu, e tatau ona faamalieina le tagata ofisa o le faamasinoga po o se isi tagata ua tofia e faafoeina le tautoga, e faapea o le tagata o le a faatinoina lana Tautoga ua:

(a) a’oa’oina lelei i le faatinoina o malosiaga o se leoleo; ma (b) e mafai ona ia faatinoina malosiaga o se leoleo.

Ae le gata i lea o le tautinoga mo Leoleo o loo ta’ua mai le vaega 7 o le tulafono e faapea:

“O Au o…………, ou te tautō atu e faapea o le a ou auauna lelei ma le faamaoni i le Malo Tutoatasi o Samoa i totonu o Galuega tau Leoleo, e aunoa ma le faaitū’au pe faapito, matau’a po o le loto leaga seia oo ina faamatuu mai faaletulafono o a’u, o le a ou vaaia ma faatupuina le nofo filemu o le Mālō Tutoatasi o Samoa e ao ona tausia ma faatumauina; o le a ou taofia e tusa ai ma le mea aupito sili e oo i ai lo’u malosi, soligatulafono uma e faasaga i lea lava Mālō, ma e faapea a o faaauau pea ona ou umia le tofi o le a ou faataunuuina e tusa ai ma le mea aupito sili i lo’u iloa ma lo’u malamalama tiute tauave uma o lea lava tofi ma le faamaoni e tusa ai ma le Tulafono. Ia fesoasoani mai Le Atua ia te au.”

Ta’ua e Fuimaono o le faamamafa o le upu tulafono i le tulafono 2009 e taua tele. E iai nisi o le a finau (sesē) e faapea o leoleo e auauna i lalo o le vaavaaiga a le Palemia o le mālō tausi ma le Ao o le Mālō, peitai o lea finauga e lē lagolagoina e se tulafono poo le faavae.

I le vaega 111 o le faavae lea e ta’ua ai le “tulafono” (law) i Samoa e faato’ā faaaoga e fua aga’i i le faauigaina e vaega masani, o le palemene ma le faamasinoga o le faaaogaina o le tulafono i taimi o finauga. Na ia ta’ua foi e lei faia le tulafono e pulea e le Pulega aemaise lava i taimi o loo solifaavae ai le pulega faatonu.

Faailoa e Fuimaono e tuuina atu nei manatu ma le mautinoa o le taimi lenei e toatele tagata Samoa e i’u na manana’o e lagolago le toe fai ai o se isi faigapalota ina ia oo mai ai se iuga i le finauga o loo iai nei. Ae o le vaai mamao lea a Tuilaepa ma le Ao o le Mālō ua leva ona fuafua mai i le tele o masina.

E ui i lea e matuā ogaoga tulaga o le temokarasi o Samoa ina ia lagolago le faaiuga a le faigapalota i le Aso 9 o Aperila. Manatu Fuimaono e māfua lea tulaga ona na manino lelei le gaioiga a le Ao o le Malo, Tuilaepa, HRPP ma le Ofisa o le Loia ma isi o le a galulue malosi ina ia mautinoa e tumau pea i latou nei i le tofi ma le amana’ia ai le iuga o le palota na palotaina e le atunuu.

I nisi upu ta’ua e Fuimaono tusa lava pe toe fai se isi faigapalota e lē mautinoa o le a lē faaaogaina e nei vaega pe faaaoga sesē foi a latou malosiaga ina ia toe tulai mai pea i tofiga maualuluga. I se upu faigofie e le mafai e nei vaega ona faalagolago ina ia faatino le mea moni e tauala atu i le faavae. O lea la o le faatagaina o a latou gaioiga e tau maualaloina ai le iuga o le faigapalota i le Aso 9 o Aperila o se gaioiga pule sauā ma leai ai se uiga o le faavae o Samoa.

Ta’ua e Fuimaono e tatau i tagata Samoa ona taofi mai nei gaioiga mai le ono tula’i mai.

Share on facebook
Share on twitter
Share on email
Share on whatsapp

LAUILOA

Keep uptodate with Radio Samoa activity & promotion

* indicates required