O ananafi lea na maua ai se sauniga sa faia i le nofoaga o le Kamupani o le Setoda Shipyard of Naikai Zosen Corporation Hiroshima, Japan sa fausia ai le vaa fou o le Lady Samoa IV i lalo o le fesoasoani a le malo o Iapani mo Samoa.
O lea sauniga sa auai atu iai mai Samoa nei le Afioga i le Tamaita’i Palemia o Samoa Honourable Fiame Naomi Mataafa i auala o fesootaiga televave faaonapo nei le zoom. Sa faamaonia mai e le Tamaita’i Palemia le sauniga lea ina ua fesootai atu iai, o le agai ese mai ai o le va’a mai le nofoaga sa faapea ona fausia ai.
O le saunoaga a le Tamaitai Palemia e lei umi se taimi na ia taua pe a mase 10 minute, ae o le Amepasa o Samoa i Iapani le Afioga ia Fa’alava’au Perina Lupematasila – Tualaulelei na saunoa e faafetaia le Malo o Iapani e ala i ona sui o le va i fafo sa auai e tusa ai o le alofa tulai o lea Malo i lana fesoasoani faaauau pea mo Samoa. Na taua e Fa’alava’au o le vaa lenei o le a fesoasoani tele e faamalosia fesootaiga ma le Malo o Amerika Samoa e ala lea i le saogalemu o felauaiga i le vasa i tulaga tau fefaatauaiga, ma le sootaga o malo e lua, aua le tamaoaiga.
O le va’a ua faimeaalofa mai ai Iapani o le a mafai ona feavea’i ai pasese, ua fausia foi mo le la’uina o uta. O le umī e tusa ma le 48 mita, e tusa ma le 1,130 tane le mamafa e mafai ona tauaveina, e aofia ai lea numera le 280 o le pasese, ma le auva’a e 17. O le maea ai o le sauniga ananafi, ua faailoa o le a tumau pea le vaa i le nofoaga o le Kamupani i Hiroshima seia faatotoga lelei uma ma faatino ni faataitaiga i lona malosi atoatoa, atoa ai ma le faia o aoaoga a le auva’a a Samoa o loo iai, a’o lei malaga mai ai i Samoa ia Aukuso o le tausaga nei.
O le vaa lenei na fausia ina ia suia ai le va’a aupito matua i va’a o loo iai i Samoa i le taimi nei, le MV Lady Naomi, lea sa fausia mai i le tausaga e 1998, aua lava femalagaiga faavaomalo faapea ai foi totonu lava o le atunuu. O le fesoasoani mai o Iapani sa auala mai i lalo o le polokalame fesoasoani o le ESDP.
