Ua faaalia e le Alii Minisita o le Fuagafanua ma Eleele o Samoa i lona talitonuga ua lē otoe aogā le finuga i le mataupu lea o le LTRA 2008 ona o le taimi nei o lea ua aveesea mai le vaega tāua sa tatou manaomia ia aua ne’i aiāina o tatou fanua faaleaganuu.

Na ia ta’ua foi ua lē o toe lesitala ni fanua faaleaganuu i lalo o le LTRA ae ua suia nei, i lalo o le Customary Land Lease.

Ma na pau le taimi e lesitala ai pe afai ua e manao e fai sau lisi ma se tagata faipisinisi.

Na faamanino foi lisi o loo faatulaga mai mo pisinisi ae ua tele naua tausaga, ae o loo iai lava tulaga i le maliega ma le tagata e ona le fanua, o se faataitaiga e ono avea ai le tagata e ona le fanua ma vaega o le pisinisi lea ma i le tulaga lelei e oo atu poo le isi 10 i le 20 tausaga o lumanai ua avea oe ma tagata e onaina le pisinisi lea. 

O le tulaga i le auai o le minisita i le faatinoga o le lisi o loo ta’ua e Toeolesulusulu o se tulaga tāua le auai o le minisita e ui o loo iai faatalanoaga i le taimi nei i le mataupu lea.

Sa ia faailoa ua iai nai pisinisi sa fai lisi ua fiu le land owner e tulituli le tupe o le lisi, ae o le malosiaga o le Minisita e mafai ai ona tagi mai iai le land owner ma faapea mai ua lua masina e lē totogia, o le taimi loa lea e faatino ai le tiute o le Minisita ma lona ofisa e ave le tusi, a lē totogia o le a se’i le lisi…. ina ia maua le seleni a lē ana le fanua.

Sa faapea mai le alii minisita…ana saini nei la na o lē ona le fanua o lona uiga ua fiu e tulituli le tupe e lē ano iai lē ona le pisinisi lea. 

O se tasi lenei mataupu sa lagalagā ai finagalo o le atunuu e oo mai lava i le taimi nei ma ua faapea mai le Alii Minisita o Faalapotoptoga Tuma’oti a le Malo ia Leatinuu Faumuina Sooialo Wayne Fong, o loo iai nei i talanoaga a le Malo faatasi ai ma pili e tolu ma e lē o se mataupu e faavavevave iai se talanoa ona o le tele o lavelave i mataupu tau fanua a le atunuu.