Ua faamautu moliaga e lima a leoleo faasaga i le tamaitai tusi solo ma tala fatu o Papali’i Sia Figiel lea o loo tuua’ia i le maliu o se tina 78 tausaga o le soifua. Peitai ua toe tolo le tuuina atu o sana tali i moliaga o le fasioti tagata faamoemoeina, fasioti tagata paivalea, umia o ni  aupega mata’utia o se samala ma se naifi laititi, ma le moliaga o le faaoomanu’a tūgā, ona ua faailoa e lē ua molia i le faamasinoga ua lē manao i se loia e tu mo ia.

Na tuu avanoa le faamasinoga i le tamaitai o loo molia, ma ia faailoa ane ai lona manao ma lana faamatalaga, ua manao e malolo le agaga o le ua maliu, ae ave loa o ia i le toafa. Na ia faailoa foi o le tiapolo ma temoni na faaosoina o ia e faatino le solitulafono. 

Sa faailoa iai e le faamasino le afioga Fepuleai Ameperosa Roma, e iai vaega o galuega tau faamasinoga e tatau ona uia, e pei o le tuu avanoa i le loia e avatu ai sana folasaga pe ua ia talia le manao o lē ua molia. O le isi itu e lua ni talosaga sa tuuina atu e le loia o Unasa Iuni Sapolu, e lei tuuina atu iai ni tali a le itu a leoleo.

O le talosaga e faasa ona faasalalau vaega anoa faasino i le solitulafono, ma le talosaga mo se sailiiliga faafoma’i i le mafaufau o Papali’i Sia Figiel, pe agavaa ona tali i moliaga. O le faailoa e le faamasino i lē ua molia ma le toatele sa auai i taualumaga o lea mataupu o le a tolopo i le aso Gafua a sau e toe valaau ai, na faailoa ai e lē ua molia i le faamasinoga o ia e le alu atu. Sa auai i le faamasinoga sui o aiga o le ua molia ma i latou o loo tapuaia lea mataupu tau faamasinoga.