O le faletua ia Natasha Willie Tavita Vaaelua, o ia lea na tusia le tusi ua faaigoaina o Leilani ma lona faleoloa. 

O se faamoemoe ma moe manatunatu iai le faletua ia Natasha Tavita Vaaelua ina ua mae’a le lockdown o le koviti i le tausaga e 2019 agai mai i le tausaga 2020. 

O le tausaga e 2021 i le aso 21 o Oketopa na faataunuuina ai loa le moemitiga a le faletua ia Natasha ua tatau loa ona fai le tusi e faaaogā ai gagana e lua o le gagana Samoa ma le faa-Peretania e momoli ai le aano moni o le tusitusiga mo fanau laiti o Samoa o loo tutupu a’e. 

O mea sa tutupu i totonu o aiga ina ua mae’a le lockdown sa maitauina ai le tele o aafiaga ua iai mātua ma fanau, e ala lea i le leai o ni galuega e tausi ai aiga, leai ni aoaoga i faleaoga mo nai fanau aoga ae ua tele lava ina nonofo i le fale ona ua telē le aafiaga o le tamaoaiga o le atunuu. 

Ua tele le vevesi o ulugalii ma aafia atu ai ma fanau i lea vaitaimi, ma o lea siosiomaga na lagona ai e le faletua  ia Natasha Tavita Vaaelua ua tatau ona fai se isi auala ina ia mafai ona fesoasoani pea i nai fanau aoga laiti e faaauau ai a latou aoaoga i totonu o aiga, e pei o le faitau o le tusi e matuā agai i fanau, ma o se auala lelei foi lea e maua ai le mafutaga vavalalata a mātua ma fanau i taimi uma. 

O le talanoa o se tasi lea auala e sili ona tāua i totonu o aiga e mafai ai ona fesootai atu mātua i fanau i le tele o taimi. 

Saunoaga lea a le faletua ia Natasha Vaaelua. 

O le igoa ua faaigoaina ai le tusi o Leilani ma lona faleoloa, o se toe fagufagu mai lea i le olaga o le faletua ia Natasha i mea sa tutupu i totonu o lona siosiomaga i Samoa a o ola ma soifua a’e ai. 

O le olaga o le tamaititi Samoa ma lona tina. 

O Leilani o loo faaigoa ai le tusi, o le igoa lea o lona tuaa (tina) o loo i Samoa, lea foi e igoa ai le isi ona tei o loo aumau iinei. 

O le olaga atoa o le faletua ia Natasha Vaaelua i Samoa sa moomoo ai e fia fai faleoloa i le faleoloa o le isi aiga tuaoi o le latou nuu. 

Ma o le ata atoa lea o lona siosiomaga ma lona tupuaga o loo mafai ona momoli mai e le tusi lenei o Leilani ma lona faleoloa. 

O le Aso Toonai 2 o Setema na tatala aloaia ai loa lea tusi i totonu o le faletusi i Mangere Bridge i Magele e faailoa atu ai le tautua ma le naunau alofa tele o le faletua ia Natasha Tavita Vaaelua i fanau aoga laiti e faamalosia ai le faitau tusi ma le mafutaga vavalalata o mātua ma fanau i taimi uma. 

O le tusi o loo tusia i le gagana Samoa ma le faa-Peretania ma o loo faaaogāina foi le gagana faigofie o aso uma ina ia mafai ona malamalama gofie fanau laiti. 

O loo iai le faamoemoe o le faletua ia Natasha Tavita Vaaelua e fai le isi tusi e sosoo mai i le tusi muamua lenei ae o loo iai foi nisi tusi ua tapena iai auā lava fanau lalovaoa o Samoa mo a taeao.