Ua i luma o le Palemene le tala faaopoopo muamua o le tupe

Ua taoto nei i le Palmene le tala faaopoopo muamua o le tupe a le faigamalo a le faigamalo a le Vaega Faaupufai o le Faatuatua i le Atua Samoa ua Tasi i lona aofaiga e $21,854,071.00 talā.

O le vaega tele o le tala faaopoopo muamua o le tupe na faaalia e le tamaitai Minisita o Tupe le afioga Mulipola Anarosa Ale Molioo e faatupe mai meaalofa i fafo lea e tusa le aofaiga ma le $19,472,807.00 talā. O le isi $4,671,359.00 talā o le a maua mai lea i vaega tupe toe fetuunai mai tupe faaalu faaagaga a Matagaluega a le Mālō. 

O loo pito maualuga le seleni i le fuafuaga o le tala faaopoopo i le $9,570,294.00 talā o le a tali atu ai i aafiaga o le atunuu ona o puipuiga o le faama’i Koviti19. 

I se vaega o le tala faaopopo muamua o le tupe na faailoa ai e le Minisita “Lau afioga i le Fofoga Fetalai i le masina o Setema 2021 na tuuina atu ai le laulauafono a le Palemene le tala faatatau autu o Tupe a le Mālō mo le tausaga 2021 – 2022 ma oute fiafia e faailoa atu o loo faagasolo lelei pea le faatinoina o polokalame ma galuega e pei ona pasia e le Palemene.

E fiafia e faailoa atu i totonu o le 4 masina talu ona pāsia e tala autu o le tupe ua amata ona faatino polokalame fesoasoani mo vaega o loo aafia ona o le pa’ū o loo iai le tamaoaiga ona o tapu mo le faama’i o le Koviti19. E le’o malōlō lau faigamalō talu ona see atu i le foe ma e viia ai pea lo tatou tamā o i le lagi ona o ana faamanuiaga ia Samoa e oo mai lava i lenei aso.

Lau afioga i le Fofoga Fetalai o lenei tala faatatau faaopoopo muamua o le tupe o loo taumafai lava e fetuunai ma toe faasoa nisi o vaega tupe faaagaga a le Mālō auā le faatinoina o nisi o atinae tāua.”

Taua foi e le Minisita “Lau afioga i le Fofoga Fetalai ou te fiafia e faailoa atu e ui i talosaga faaopoopo o le a folasia atu o loo iai le faamoemoe o le a tuuitiitia le faasiliga o tupe alu a le Mālō nai loo ana tupe maua i lalo o lenei tala faatatau faaopoopo muamua o le tupe mai le 2.5% i le 2.4% o le tamaoaiga.”

E 14 aso ua taoto atu ai le tala faaopoopo muamua o le tupe mo le tausaga faaletupe o loo faagasolo i luma o le Komiti o Tupe a le Palemene mo le iloilona ona faatoā soalaupule ai lea e le Fono Aoao Faitulafono i lana tauaofiaga amata i le tausaga fou 2022. 

Share on facebook
Share on twitter
Share on email
Share on whatsapp
Scroll to Top

Keep uptodate with Radio Samoa activity & promotion

* indicates required