O lea ua pa mai le tala i taaloga a Ausetalia, ua faatea ese nei le alii faiaogaulu o le aulakapi tele a le atunuu, le Wallabies, le susuga Dave Rennie, ae ua sainia nei ma faamautinoa e le Iuni lakapi a Ausetalia le tauaveina e le alii o Eddie Jones o lea tofiga o le faiaogaulu ma o ia lea o le a taitaia le tapenaga a le Wallabies mo le sauni atu i le taamilosaga a le Ipu o le lalolagi i le tausaga lenei 2023 i Falani.

O le taimi lona lua lenei ua tauave ai e Jones le tofi faiaoga mo le ‘au tele a Ausetalia le Wallabies. Sa faiaoga muamua i le Wallabies mai le 2001 i le 2005, lea na ausia ai e le Wallabies le final o le Ipu o le lalolagi i le 2003.

Na sosoo ai ma le avea ma faufautua mo le ‘au tele a Aferika i Saute, le Springboks ma manumalo ai i le Ipu a le lalolagi i le 2007, ae mai le 2012 e oo i le 2015 na faiaoga ai i le ‘au a Iapani, ma sa tulai mai ai lena ‘au i se tulaga maualuga i le Ipu a le lalolagi i le 2015 lea na manumalo ai ia Aferika i Saute.

E lima tausaga le umi o le konekarate lea ua saini ai nei Eddie Jones ma le Wallabies e pei ona ta’ua e le taitaifono a le Rugby Australia, Hamish McLennan o loo lipotia i le Fox Sports, ma o le a amata i le aso 29 o Ianuari.

Lona uiga o lea o le a faiaoga Jones i le Wallabies i taamilosaga o Ipu a le lalolagi mo le 2023 ma le 2027, faapea foi ma le taamilosaga a le British & Irish i le 2025.

Ta’ua i lipoti mai Ausetalia e faapea, na faafesootai e le Rugby Australia Jones mo se avanoa e toe foi mai ai ina ua faia’ina lana ‘au a Egelani i le Wallabies i le masina o Iuni i le tausaga talu ai, peitai sa galue pea Jones i lana konekarate mo le RFU, peitai la o le masina talu ai, Tesema na iai suiga ina ua faamalolo ese Jones mai le RFU poo le ‘au a Egelani se faiaoga ai.

O Jones ua 62 tausaga o lona soifua.