Ua faamanatu ai i lenei vaiaso le atoa ai o le 40 tausaga talu ona faavae mai le Iunivesite Aoao o Samoa i le tausaga e 1984.

O le savali tele na faatumulia ai se vaega o le taulaga i Apia i le aso ananafi i alo ma fanau faapea le mamalu o le atunuu sa aoaoina i le Iunivesite o Lepapaigalagala i Vaivase.

O loo faatupulaia pea alo o le atunuu e maua avanoa e aoaoina ai i le Iunivesite ma o le siitia ai o le numera ua faapea foi i le tupe faamatuu atu e le malo mo le Iunivesite e ala i lana paketi.

O le faamanatuga ua toe manatua ai lona amataga, lea e na o le $5 le paketi sa amata ai.

O alo ma fanau na amata i lea taimi e na o le toafasefululima mai le tausaga faavae atoa ai ma nai faiaoga e i lalo mai o le 20 le aofai.

I le tausaga nei 2024, ua lata i le $30 miliona le paketi, 3000 ma ona tupu tama ma teine a’oga i polokalame eseese e 100 ma ona tupu, ma le aofaiga o le aufaigaluega e silia ma le 300.

A fua la i nei tausaga e 40, mai le 1984 i le 2024 ua luasefululima afe, onoselau ma le fasefulufitu (25,647) tagata ua faau’u mai ma faailoga, mai le tatou Iunivesite Aoao o Samoa.

Saunoa  le afioga i le Minista,o Seuula Ioane, e 41% pe tusa ma le sefuluafe limaselau ma le tolusefulufitu (10,537) o i latou na fa’au’u mai le Tausaga Faavae, e 34% pe tusa ma le valuafe fituselau ma le valusefuluiva (8,789) na faau’u mai polokalame o faailoga tikeri ma faailoga maualuluga.

Ma le 25% poo le onoafe toluselau ma le luasefulutasi (6,321) o i latou ia na faau’u mai i polokalame Faamatātāeseese.

Na maua foi le avanoa e malele faamanuia ai lana afioga i le Ao Mamalu o le Malo o Samoa o ia foi o le Faaao o le Iunivesite o Tuimalealiifano Vaaleto’a Sualauvi II i le faamoemoe.

Na faaiu le faamoemoe i le taeao ananafi i siva ma faafiafiaga na faatino e alii ma tamaitai faiaoga faapea ai ma fanau o loo aoaoina i le Iunivesite Aoao o Samoa.