Ua faaātaāta mai nei le lagolago ai e le Minisita o le Va i Fafo o Aoteraroa, Vaovasamanaia Winston Peters o le savali ma le finau o loo faasolo nei e ala i se talosaga o se petition, e talosagaina ai le malo ina ia mafai ona faimalaga ma ulufale mai tagata o le Pasefika i totonu o o Niu Sila e aunoa ma ni visa, e pei ona taulamua ai lē a avea ma faipule le afioga ia Anae Arthur Anae.
I tulaga o le talosaga ma le finau, ia mafai ona ulufale i totonu o le atunuu mo le 3 masina e aunoa ma le faia ai o nisi feuia’iga ma le totogiina.
Faamatala e le alii Minisita i le faatalanoaga ma le PMN o le a galulue soosootau’au Niu Sila ma Samoa i lea matāupu; faaopoopo mai foi, e soo se finauga mo suiga e moomia lava le lagolagoina e le malo o Samoa.
Faailoa e Vaovasamanaia lona malamalama lelei i faseā ma le tele o faafitauli i visa e pei ona māua ai e faatuai ai le maua o visa ma oo ai lava ina aafia ai fuafuaga, ma faamoemoega sa tatau ona aga’i mai ai le to’atele.
Ta’ua e le minisita o loo iai fuafuaga e faatino faatalanoaga ma Samoa, e taga’i i le matāupu e pei ona faaalia ai le ono telē o aafiaga ia Samoa ma le tulaga o tagata e malaga ese. Ae o le a tālia pe tulaga o faatalanoaga i le va o malo e lua.
