O si vavae mu itiiti na amata tutu mai i le aso 8 Mati 1999, ae maeu lava le agalelei o le Atua, auā e ui i fita ma lu’itau sa fetaia’ia i le tele o taimi, ae sa ia faatonufolau pea ma fesoasoani i le faatofāla’iga a le susuga i le Faafeagaiga Lui Ponifasio ma le Faletua ia Ane Ponifasio, ma i latou uma sa lagolago atu, lenei ua oo ina avea lena vavae mu itiiti ma lamepa mumū saesae ua susulu atu ma sulugia ai ua lē na o Aukilani nei, ua lē na o Niu Sila nei, ae ua sulugia ai le kelope atoa, i le auaunaga a le Radio Samoa 1593AM.
O se kamupani ua mauaa lona tulai mai i totonu o faalagamaea o auaunaga tau faasalalau i le itu o leitio faalogologo, i Niu Sila nei, peitai o lona amataga mai ma le moemitiga autu lava na afua ai ona fotua’i lenei auaunaga, ina ia faaoo atu faamatalaga, o faasilasilaga ma faafiafiaga auā le tautuaina o le mamalu o Samoa o loo nopia’i ai i totonu o Niu Sila.
O le Radio Samoa 1593AM, sa amata mai i le na o le leitio, peitai i le taimi nei, ua mafai foi ona faafofoga ma maimoa iai i ana faasalalauga uma i luga o isi auala o fesootaiga faaonaponei, e pei o le facebook, o lana upega tafailagi, ma luga o le YouTube.
O le susuga lava i le faafeagaiga, Ps Lui Ponifasio na amata maia le leitio, ma fesoasoani atu i ai le susuga i le a’oa’o, Tavai Meni ma le susuga Semau Mataio Sagala, mulimuli ane ua faalautele atu ma iai isi ua latou galulue faatasi.
Mai la i le aso 8 o Mati i le 1999 seia oo mai i le asō, aso 8 o Mati i le 2024, o lenei ua atoa le 25 tausaga talu ona pesepese le Radio Samoa i totonu o lou maota ma lou laoa, e molimoli atu soo se manaoga tau faasalalauga auā lou nofo silafia i mea o loo tutupu i Niu Sila nei, i si o tatou atunuu o Samoa, aemaise foi o soo se tala i mea o tutupu i le lalolagi atoa.
O le uluai ofisa na amata mai ai le leitio, o si tamai potu i se faletaavale i Nikau St Eden Terrace, ona toe faasee ane lea i le tuatusi 37 Mt Eden Rd i Mt Eden, o le ofisa ma lana auaunaga o le nusipepa le Samoa Times sa faatulaga i le tuatusi i Dunnortar Rd i Papatoetoe, ae o le aso 13 o Me i le 2009 na faasee mai ai loa le leitio i lona nofoaga autu e pei ona iai nei, i le tuatusi o le 3/36 Hobill Avenue, Wiri i Manukau.
E pei ona muai ta’ua, e na o le toatolu i latou na amata maia lenei auaunaga, ae na vave ona lagolago atu iai le afioga Savea Al Harrington Lavea, aemaise le susuga i le Papaliitele Lafulafu Peo, ae i le taimi nei ua toatele le aufaigaluega, e iai nisi sa galulue ae ua faasee atu i nisi galuega, o isi foi ua saili manuia atu i isi atunuu, ae lē faagaloina i latou ua motusia le mafutaga ona o le malaga a le maliu ma le oti.
E 4 vaega autu ua faatulaga ai polokalame a le Radio Samoa, o le Breakfast Show i le taeao mai le 6am i le 10am, o le Fiafia Mai e maua ai le ata ma nai faafiafiaga mai le 10am i le 2pm, o le taimi o le manava o galuega le Drive Time mai le 2pm i le 6pm, ae faatini e polokalame o le afiafi mai le 6pm i le 12am i le vaeluaga o le po e fua lava i le umi o nisi o polokalame faaleagaga ua faatulaga ai.
O isi itula i tua atu seia toe aulia mai le 6am i le aso e sosoo ai, e faatulaga ai loa le masini mo pesepesega eseese mo le faafofoga a i latou o loo moomia pea le leitio e faalogologo ai a o feagai ma galuega poo nisi fuafuaga o le afiafi.
I totonu o na vaega autu e fā, o loo faatulaga ai le tele o faasalalauga faapisinisi, o faasilasilaga a nuu ma afioaga, aiga ma faalapotopotoga, o polokamale a nisi o ekalesia aemaise lava i afiafi o Aso Sa, o faasoa i mataupu faaleaganuu, mataupu faapisinisi, mataupu tau a’oa’oga, le soifua maloloina, aemaise foi avanoa o loo maua ai faatalanoaga ma sui o le Malo i Samoa ma Niu Sila nei.
Ua 25 nei tausaga, ae o le talotaloga ma moomooga o le Pulega ma le aufaigaluega atoa a le Radio Samoa, ia faaopoopoina pea nisi tausaga se tele e faatino ai lana auaunaga ma lana tautua mo oe Samoa le atunuu pele.
