Ua tuumalo i Aukilani nei le Purinisese o le malo o Tonga lea sa ia taliaina aloaia le faatoesega o le Dawn Raids mai le malo o Niu Sila, ma o lea lipoti ua faamaonia mai e le ofisa o le aigatupu i Nukualofa ma lipotia i le televise tasi i le asō.
O le po anapo na tuumalo ai Purinisese Mele Si’uilikutapu Kalaunivalu Fotofili a o siomia e si ona aiga.
O ia o le afafine ulumatua o Perenise Tuipelehake ma o se tausoga o King Tupou VI, o grandchildren uma i laua a le tupu tamaitai o Salote o le malo o Tonga.
O le 2021 na talia aloaia ai e Purinisese Si’uilikutapu le faatoesega mai le malo o Niu Sila e tauala mai i le Palemia i lea taimi o Jacinda Ardern mo osofaiga i vaveao sa faia i tagata Pasefika mai le vaitau o le 1970.
Na ta’ua i le lipoti sa malosi lona finau i le faatumauina o le gagana a Tonga auā fai mai a ia e tāua ma afai e leiloa le gagana o le a leiloa foi ma le aganuu ona leai lea o se malamalamaaga.
O le a toe faafoi atu lona tinomaliu i Tonga e lagomau ai i le Malae Kula Royal Tombs ae le o mautu mai se aso i le taimi nei.
E maliu le tamaitai Purinisese ua 75 tausaga o lona soifua.
