Ua faamanavaina e le Atua galuega a lē sa avea ma Faamasino Sili i tausaga e tele ua tuanai le afioga ia Patū Ti’āvasu’e Falefatu Sapolu. 

O Patū na soifua mai i le tausaga e 1951 ma ua loa lana tautua ia Samoa tauala atu i le Matagaluega o le Faamasinoga. O le tausaga e 1988 na galue ai o ia o le Loia Sili a Samoa seia oo atu i le tausaga e 1991. Na tofia lea e avea ma Faamasino Sili i le tausaga e 1992 seia oo ina faamavae i le tausaga e 2019. 

E silia ma le 40 tausaga o le tautua a lea tamalii i le atunuu ma o le a manatu pea e le toatele ana galuega mo Samoa. Na vaaia le tele o faamaisega e le gata o Ekalesia i le atunuu ae faapea uo ma e masani a le afioga ia Patū na faaali o latou moomooga alofa mo lana afioga i luga o upega tafailagi. 

O le afioga ia Patū o se tasi o poutū i le galuega faafaamasinoga, ma i le tausaga e 2019 i lana lauga faamavae mai le tofiga Faamasino Sili na ia faafoi ai le viiga ma le faafetia i le Atua i lana puipuiga ia te ia ao tulai mai ai i le tofi. Na ia taua foi ina ua filifilia e avea ma Faamasino Sili i le tausaga 1992 na te le’i taliaina i se taimi vave na atoa le masina o mafaufau pe na te talia le tofiga. 

E tuumalo lana afioga ua 69 le matua o lona soifua ma e 43 tausaga na galue ai i le atunuu tauala atu i le faamasinoga.