Ua faaalia e le iuni o tagata taaalo faapolofesa i le taaloga o le soka faavaomalo, ua mae’a ona o latou tuuina se tusi i le FIFA ina ia faatutusa faailoga tupe e maua o le Ipu o le lalolagi.
O le televise a Niu Sila ua lipotia ai e faapea ua faamaonia mai lea tusi e le FIFPRO ma ua ta’ua atu i le tusi e tatau foi ona tuuina ane tulaga tutusa o le faia o taaloga mo ‘au a tamaitai ma ua faailoa foi o lenei tusi ua sainia e le tusa ma le 150 o tamaitai taaalo a o sauni ai mo le ipu o le lalolagi i lea faagatama i le itupa o tamaitai i le tausaga nei lea e talimalo ai i Niu Sila ma Ausetalia.
Fai mai la le faamatalaga o lea tusi ua sainia atu e teine taaalo mai ‘au uma i le lalolagi ma tuuina atu i le FIFA le faapotopotoga o loo faagaioia le taaloga ma o loo feutagai ai nei.
O le Ipu o le lalolagi i le itupa o alii na malo ai Argentina i Qatar e tusa lea ma le $68 miliona tala Niu Sila ae o le manumalo i le Ipu o le lalolagi i le 2019 na malo ai le ‘au a Amerika e $6.4 miliona i taaloga na faia i Farani.
E lei iai se faailoga ua faatulaga mai mo le taamilosaga o loo loma nei ae o lea la ua valaau tamaitai taaalo ua tatau ona faatutusa faailoga o nei taamilosaga.
O le aso 20 o Iulai e amata ai le taamilosaga ma e 32 ‘au ua sauni e tausinio ai mo le Ipu o le lalolagi i le soka a tamaitai.
