Ua tuuina atu e le Faamasinoga o Fanua ma Suafa le 4 vaiaso e tapena ese ai le lata i le 100 aiga o loo nonofo faasolitulafono i eleele i tua o le 723 eka e pulea e Alii ma Faipule o Afega.
O le lona 9 ai lea o faaiuga a le Faamasinoga o Fanua ma Suafa ua faia i lea lava mataupu ua loa ona vevesi ai.
O le itu a le afioaga o Afega na talosaga, na taitaia e le sui a Faipule o Maulolo Tavita Amosa ma Ututaaloga Charlie Ulia.
O le itu tetee na taitaia e Sala Fili Lauano ma Sala Josephine Stowers.
I le fofogaina o le faaiuga e le Faamasino ia Folasa Tuioti Sakaria Taituave na toe faamalamalama ai o eleele o loo nofoia e aiga e lata i le 100 e pulea e Alii ma Faipule o Afega i lalo o le faamalumaluga a Fata ma Maulolo.
O mafuaaga o le talosaga a le afioaga o Afega o le faalavelave o Leauvaa i le faatinoga o galuega, o le lafo o faaupuga masoa, tase’i ese o pine fua fanua o loo tosi ai tuaoi, e lē gata i lea o le tapue o ata ma tuu i luga o le upega tafailagi e faamaasiasi ai le afioaga, faapea ai ma le faatau e nisi o aiga o eleele o loo i tua o le 723 eka.
Na teena malosi e Leauvaa ia tuuaiga.
O le finauga a Leauvaa na faaleo e Sala Fili Lauano i le aso o le faamasinoga, o eleele o loo i tua o le 723eka o fanua na to atu e le afioaga o Afega e galulue ai, ma o lona talitonuga e na o le faamalumalu lava o Fata ma Maulolo ae lē toe aiāina e i laua ia fanua.
E lei fia faaalia se finagalo o le sui Faipule o Afega o Maulolo Tavita e tusa ai ma le faaiuga ua tuuina mai.
Ua ta’ua foi e nisi o le afioaga o Leauvaa, sa lē tatau ona faia se faaiuga a le Faamasinoga o Fanua ma Suafa i le mataupu, ona o loo ua i luma o le Faamasinoga Maualuga la latou talosaga e iloiloina ai.
Na ta’ua foi e le sui o le afioaga o le talosaga ua tuuina atu o eleele o loo nofoia e aiga ua aafia o eleele umia saoloto.
Ae na manino foi le faamasinoga i le molimau a Ututaaloga Charlie Ulia, ua mae’a ona fua eleele i tua o le 723 eka, e leai foi ni eleele umia saoloto o iai e pei ona finauina e Leauvaa.
O le faaiuga autu, ua poloaina i latou ua ta’ua suafa ia tulai ese mai i eleele i tua o le 723 eka e pulea e Fata ma Maulolo ma alii ma faipule o Afega i totonu o le 4 vaiaso mai le aso o le faaiuga ia lē silia le aso 5 o Aperila 2024.
