O le toe maua ai o nisi o tagata malaga atu i Samoa i vairusi o le Koviti19 ua ave ai le tuualalo a le taitai o le malo, le Tamaitai Palemia i le atunuu ina ia faaauau pea puipuiga o le soifua maloloina lautele ma aua nei faapopoleina.
O le faaiuina o galuega a le fono aoao faitulafono i le Aso Tofi e pei ona tauaofia ai lenei vaiaso na saunoa ai le afioga le tamaitai Palemia Fiame Naomi Mataafa ma ia faailoa i le Palemene ma le atunuu le to’a 10 o le pasese mai Brisbane ua aafia i siama o le faama’i ma ia faailoa ai le faia o se faaiuga e ono taofia ai mo se taimi lē tumau malaga togipau mai Ausetalia o loo malaga atu ai nisi o le atunuu faapea nisi o tagata mo galuega faavaitaimi.
Faailoa e Fiame i totonu o le fono a le palemene “Lau afioga i le Fofoga Fetalai ona o le tulaga i le puipuia pea o le atunuu mai lea faama’i aemaise ai le alia’e mai o lea tulaga i nisi o le pasese na taunuu mai ananafi (Aso Lulu) ua manatu ai le Kapeneta ina ia tolo le malaga na fuafua mai i Niu Sila i le Aso Toanai nei mo se vaiaso ona toe iloilo ai lea”.
Taua foi e le Palemia “O lenei tulaga ua lē alofia, ina ia maua ai le avanoa lelei e o tatou fomai e saga matimati ai le mataituina o le pasese na taunuu mai aemaise le vaavaai toto’a o i latou ua aafia nei. E ono iai foi se fuafuaga ina ia faapafala le toe malaga mai o tagata mai Ausetalia mo lenei taimi seia mataitū le tulaga o le pepesi ai o le vairusi o le omicron o lea atunuu”.
Na ave ai foi le tuualalo a Fiame i le atunuu ina ia aua nei faapopoleina se tasi, o loo galulue pea le Matagaluega ma le malo e faatino lea galuega ua atoa nei le 2 tausaga o faaauau pea auā lava le puipuiga o Samoa atoa. E le gata i lea ua tatalo le Palemia i sui usufono uma ina ia taimua i le unaiga o puipuiga mo le saogalemu lautele e pei o le faia o tali fofoga poo masks, fufulu mama lima, ma le social distance.
