Ua tuuaia e le Palemia o Ausetalia le taitai o le Itu agai o Peter Dutton i lona taalo i le mataupu e faatatau i le Indigenous Voice to Parliament.
O le vaiaso nei na faamautu ai e le Palemia le faaupuina o le fesili o le a faia i le referendum lea o le a saili ai finagalo o tagata lautele i le mataupu e faatatau i se leo o Indigenous people i le Palemene a le atunuu.
Fai mai Albanese ua tatau lava ia Dutton ona faailoa sa’o lona finagalo i le mataupu lenei auā e le o se mataupu e faatatau i se isi o i laua, ae o se mataupu o loo fesiligia ai pe mafai ona amanaia se sao o tagata indigenous e aofia ai Apoliki ma i latou na muai nofoia le atunuu.
E manatu le Palemia ua tatau i le taitai o le Itu agai ona faia loa sana faaiuga i le mataupu ae lē o le faaumiumi ai fua o le mataupu.
