E toa 20 tagatanuu o Samoa o loo aumau ma nonofo i totonu o Isaraelu i le taimi nei ona o galuega ma tiute faalelotu, a o nisi ua mau paolo i tagata Iutaia.
O se tasi o alo ma tamafanau a Samoa sa galue o se Malu o le Malo, ae ua tautua nei i le vaega o le puipuiga a Malo Aufaatasi i totonu o le aai paia o Ierusalema le susuga Vincent Jnr Schmidt sa maua iai se fesootaiga i le Aso Lua o le vaiaso nei ma faatalatalanoa ai e tusa o le latou saogalemu a o tulai mai le taua i le va o tagata faatupu vevesi ma fouvale a Palesitina le Hamas, ma fitafita o le Malo o Isaraelu.
O le iai o le susuga Vincent Jnr Schmidt i Ierusalema ona o tiute ma galuega ua tautua ai i Malo Aufaatasi, ua momoli mai ai ona alofaaga i ona aiga uma i Samoa, aemaise o lona tuaa tina.
O le aoauli ananafi taimi i Isaraelu na faaalia e Vincent, na malaga ese ai le aumalaga o tagata Fiti ma le toa 20 o tagata Samoa sa auai i le faamanatuina o se aso faalelotu sa faia i totonu o Isaraelu i le Aso Faraile na tea nei.
