Ua nofo faatali nei mātua o se tamaitai talavou 20 tausaga le matua, i se galuega a leoleo e saili ma toe aumai ai i Samoa se tagata mai fafo o se tama tane e faapea mai molimau faatuatuaina, ua toe tuua Samoa ma foi i lona atunuu ae o loo suesueina e leoleo se tagi faasaga i lea tagata i se mataupu tau faiaiga fai faamalosi.
O le po o le aso 6 o Setema e pei ona faaalia e le tamaitai na aafia na tupu ai lea gaioiga solitulafono ia te ia, i le taimi ua mānava mai lana galuega.
O le Aso Toonai le aso 9 o Setema na faaulu ai le mataupu i leoleo ma faia suesuega, ae o le Aso Gafua 18 o le masina lava na tea nei na tuua ai le atunuu e lē o loo tuuaia.
Faaalia e se molimau e sue atu lea tagata ua malaga ese ma le faletalimalo ma agai i le malaevaalele, ae o loo tu le taavale sa ia faaaogāina i le faletalimalo.
O mafatiaga o le tama o le teineititi na aafia i lea tulaga na tulai mai, na oo ai i le ofisa o leoleo mo se tali o lana fesili, pe aisea na tuai ai ona faatino e leoleo le taofiga o lea tagata mai le tuua o le atunuu.
Faaalia e le tama o le teineititi na aafia, na faatoese ane le Komesina i se lape o le latou galuega ae na faailoa ane, o le a saili i fesootaiga i le auaunaga faaleoleo o le Pasefika ma le Interpol, pe maua ai ni faamatalaga o lea tagata ina ia taumafai ai se galuega e toe aumai e tali i tuuaiga.
O se finagalo o le tamā o le tamaitai na aafia, ma o le a lē faailoaina lona suafa i le taimi nei.
O lē na aafia sa fesiligia e tusa o le gaioiga na aafia ai.
Sa ia faamatala o lana sailiga tupe i le pule o le faletalimalo e fai ai lona tusifolau e alu ai i se avanoa mo galuega faavaitaimi, na ofo ane ai le pule e maua ia te ia le seleni.
O le afiafi lea o le Aso Lulu 6 o Setema ina ua manava na agai ai i le pule, ae sa faatonuina o ia e agai i le potu e faatali mai ai.
Faaalia lava e le tamaitai i le ma talanoaga, na faainu o ia i le uaina ma onā ai, lea na saofia ai ma le gaioiga ia te ia.
O le avanoa na ia maua sa tifa atu ai lana onā i le nofoaga mo le aufaigaluega ma faailoa iai le mea na tupu.
O lana faamatalaga o ia e lē taumafa ‘ava.
Le tamaitai 20 tausaga na aafia, ae ua taofia le faailoaina o lona suafa.
Ua galue nei i se tasi o faletalimalo i totonu lava o le taulaga i Apia.
O loo faatalitali pea ona mātua i se tala atu a leoleo ia latou sailiga pe toe maua ai lē ua tuuaia, ma toe aumai i le atunuu.
Faaalia e nisi o tagata faigaluega o le faletalimalo, e lei atoa se tolu masina talu ona galue lea tagata i le pulea o le pisinisi.
Sa maua se fesootaiga i se tasi o le pulega o lea faletalimalo o se tamaitai ma sa faailoa iai pe na te faamaonia ua alu ese ma Samoa lē sa avea ma pule, ma le mataupu ua oo i leoleo.
E lei atoa se minute o le talanoaga ae momotu le valaau ma e lei toe taliina mai le numera o le telefoni feaveai a lea tagata faigaluega o le faletalimalo.
