E leai se itumalo faapalota ua mae’a ona faaaogā le latou miliona tala muamua mai le poloketi a le Malo ua faasafua ai ia vaegatupe mo le atina’e o aiga o nuu ma afioaga o itumalo e 51.
Ua faailoa e le Minisita o le matagaluega o tina ma tamaitai atina’e o afioaga ma agafesootai o loo vaaia le poloketi o le miliona tala, e na o le 32 itumalo ua mae’a ona faamatuu iai le latou tai 425,000 mulimuli o le miliona muamua ma o loo faaauau ona faaaogā ia latou atina’e ma e lei tuuina atu ni lipoti o faamatalaga o le faaaogāina o tupe.
I le vaegatupe e 200 afe lea na uluai faamatuu i le tausaga muamua o le poloketi lenei e amata tapena ai ofisa o fono faavae, e 50 itumalo ua mae’a ona faaaogā a latou seleni ma ua tuuina atu lipoti ae tasi le itumalo o loo tālia pea le latou lipoti.
E lē o faailoaina e le minisita le afioga Leota Laki Lamositele Sio poo ai lea itumalo, ae o le 51 miliona o le poloketi lenei ua pasia mo le tausaga faaletupe fou ua faagasolo, e leai se itumalo ua tuuina atu se talosaga mo le faaaogāina o le latou miliona lona lua.
Ua faaalia e le Minisita i le feiloaiga ma tusitala o Tesema o le tausaga nei ua tuu avanoa ai le komiti a le Kapeneta e fitoitonu ma le poloketi e tatau ona mae’a faamatuu ai le tai miliona tala muamua mo itumalo.
E 19 itumalo e lei mae’a ona faamatuu iai vaegatupe o le uluai miliona tala.
Le afioga i le Minisita o le matagaluega o Tina ma Tamaitai atina’e o afioaga ma agafesootai o loo vaaia le poloketi o le miliona tala.
