Sa alu le alii o Tia Meaalofa Salima e faatau savali ana salu ma afe ai i le fale o se aiga i Lalovaea pe mana’o i se salu.
Faaalia e leoleo na fiu le taulealea e faatali e leai se isi o le aiga na alu ane, ae o le tinā e ana le fale o loo faigaluega ae na o lona tinā matua sa faamuli ae sa tofa i le taimi na afea ai e Tia i lana faatauga salu.
O le avanoa lea e pei ona faailoa e leoleo i luma o le faamasinoga, na a’e ai le taulealea i luga o le pa o loo si’o ai le fale ma le fanua ma ulufale faamalosi ai i le fale o le aiga.
Sa ia aveesea ai i se auala solitulafono ni meatotino aogā e tolu afe 768 tālā lo latou tau aofa’i.
E tasi se meatotino na toe maua ma faafoi o le telefoni feavea’i.
Ina ua tula’i lē ua molia mo se faai’uga na faatāua lona ioeina o moliaga ma o le ulua’i taimi lea ua tula’i ai i le faamasinoga i se solitulafono, e ui e iai isi moliaga faapea o loo mulimuli mai e le’i su’esu’eina.
O le faasalaga o le 3 masina sa nofo taofia ai i le vaaiga a leoleo ua avea lea ma faasalaga i le falepuipui peita’i ua nofo vaavaaia Tia Meaalofa Salima mo le 18 masina i le vaavaaiga a le ofisa faanofo vaavaaia.
Faaopoopo iai ma le 150 itula e faigaluega fua ai mo le lelei o tagata lautele.
