E lē o iai se suiga o le mau tauave a le matāgaluega o leoleo, falepuipui ma le toe fuata’ina i le leai lea o ni molimau e faamaonia ai o loo gaosi i Samoa le pauta faasāina o le ‘aisa poo le methamphetamine lea ua saoasaoa le faaaogāina i Samoa.
E 12 masina o le polokalame faalauiloa a le matāgaluega o loo momoli atu ai le fe’au i le atunuu i le fai atu leai i fualaau faasāina poo le say no to drugs, ma ua faailoa ai e le Sui Komesina o le matāgaluega le susuga Leiataua Samuelu Afamasaga o lea taumafaiga a le matāgaluega ua afea ai nisi o mafutaga a tupulaga talavou i nisi o Ekalesia i Upolu faapea ma Savaii.
Ae i le faatupula’ia o solitulafono e aafia ai laau ma fualaau faasāina poo nakoti, sa fesiligia le Sui Komesina o leoleo i le feiloa’iga ma tusitala sa ia taloina i sona finagalo i le mau a le Komesina o leoleo ua mae’a lona taimi galue sa ia faailoa ai o le tuaoi o feoa’iga i le va o Samoa ma Amerika Samoa o loo pito tele ai le fualaau faasāina o loo ulufale mai ai i Samoa.
Le afioga i le Sui Komesina o leoleo, falepuipui ma le toe fuata’ina, susuga Leiataua Samuelu Afamasaga.
