E silia ma le 12 kulupu o aoga ma Aoga Amata ua tutu faatasi e tapaina le alii Palemia, Christopher Luxon, e faatumau le faatupega o le polokalame o meaai a tamaiti aoga e maua fua ua iloa ai o le Ka Ora Ka Ako.

I se tusi ia Luxon sa lomia i le aso ananafi, sa faaalia ai e lea faalapotopotoga, o lea polokalame e tāua tele.

O kulupu sa saini i lea tusi, e kava ai le Katoliko, aoga faaleonolua, aoga tulagalua, aoga maualuluga, ulu aoga a Maori, iuni e lua a faiaoga, aoga amata ma se tasi o asosi autu o aoga amata.

Sa latou faaalia ai, ona o i latou o taitai o vaega tau i aoaoga, ua tutu faatasi ai e tapaina le alii Palemia e faaauau le tulaga o iai nei le inivesi a le malo i lea polokalame a le Ka Ora Ka Ako, mo meaai mo aoga.

Sa latou tusia ai foi, e toatasi mai le toalima o tamaiti i le atunuu e feola matitiva, ma o meaai lelei mo le ola maloloina e moomia mo aoaoga a tamaiti, sa mafua ai ona faavae lea polokalame o meaai e maua fua mo aoga.

I le taimi nei, o lea polokalame o loo ofoina ai meaai mo le 230,000 o tamaiti aoga e le i lalo ifo ma le afe aoga e tulaga lē lelei, ma ofoina ai se upega o le saogalemu faasaga i le matitiva i meaai ma le tulaga lē lelei o meaai e maua ai le ola maloloina.