Ua ave le faafetai a le tofa Ulu Bismark Crawley i le tofa Ale Vena Ale sa seei i le tofi faipule o Faleata 4 i lona finagalo malamalama, ua mafai ai ona la tauva i le palota laititi a le itumalo faapalota mo le toe sailia o se sui usufono i le Palemene e faaauau masina ma tausaga o totoe o le paeaiga lona 17 a le Palemene.
O se feiloaiga ma le tofa Ulu na ia faailoa ai lea tulaga ma ia faamautu ai foi o ia e tauva tutoatasi ma afai e manuia o le a faaauau pea ona tutoatasi i le Palemene e lē lagolago i se vaega faaupufai.
Na ia faaalia foi ua lē tauva mo le vaega e puipuia aiātatau a tagata e pei ona sa lagolago ma avea ai ma sui tauva i nisi o faigapalota ua tuanai, ona ua ese foi le lagona o tagata o lona nuu ma le itumalo.
O le tofa Ulu Bismark Crawley sa avea ma se tasi o Ofisa Sili o le pulega o le matagaluega o puna’oa faalenatura ma siosiomaga i ni tausaga ua mavae, ma o ia foi sa avea ma fofoga o le komiti o faalavelave faafuasei i le faalauiloaina o tapenaga o le faama’i misela ma le Koviti-19.
Na faamavae ma lana galuega i le Malo ina ua sauni i le palota tele o le 2021.
