Tumutumu le atunuu i falema’i o loo maua ai le fesoasoani fua a foma’i o le fitafita a Amerika ma Ausetalia

O le polokalame fesoasoani le Pacific Partnership ua aofia ai sui o le fitafita o le malo o Amerika i se faigāpaaga ma isi malosi tau fitafita a le malo o Ausetalia ma le atunuu o Farani lea o loo faia se latou galuega fesoasoani i lo tatou atunuu e vaai fua ai foma’i o ia malosi faafitafita e aunoa ma se totogi, ua molimauina ai le to’atele o le atunuu ua aga’i i falema’i faaitumalo i Upolu mo lea fesoasoani.

O le Aso Tofi lenei o loo maua ai lea fesoasoani i le falema’i faaitumalo i Saanapu ina ua mae’a falema’i i Poutasi, Lalomanu, ma Faleolo aemaise o le hall a le EFKS i Mulinuu.

O le Aso Faraile le faai’uga o lenei vaiaso e oo atu ai i le falema’i faaitumalo i Lufilufi.

O fofoga poo mata ma oloa poo nifo o loo autū iai le galuega fesoasoani a foma’i mai lea polokalame.

O le tasi o fesoasoani o loo faatino i le polokalame lenei o loo galulue ai inisinia faufale o le fitafita a le Malo o Farani i le faaleleia o nisi o falea’oga tulagalua.

O le Aso Faraile e pei ona faailoa e se sooupu o lea polokalame fesoasoani, o le a faia ai se faaaloalo a le fitafita o le sami o Farani mo sui o le malo o Samoa ma nisi o malo valaaulia.

E faia lea tali faaaloalo i luga o se vaaleoleo o le sami o le malo o Farani o loo i Samoa.