O le sainiga o le maliega o le Memorandum of Understanding i le va o le NZ Rugby ma le Japan Rugby Football Union, o le a le avea lea ma ala e tatala ai le avanoa mo tama taaalo o loo faamautu i atunuu i fafo e toe agai mai ai i le All Blacks.
O se faamatalaga lea ua lipotia i le Stuff.co.nz i le vaiaso nei ua ta’ua ai o le maliega lea na sainia o le a faaopoopo ai le aofai o taaloga faia i le va o le All Blacks, le All Blacks 15 ma le Maori All Blacks faapea foi ma ‘au a le Iuni a Iapani e aofia ai le Brave Blossoms ma le Japan 15 i le piliota lea o le 2024-2027, ae o le a tumau pea ona tapunia le faitotoa i tama taaalo Niu Sila o loo faamautu i fafo e fia malaga mai e avea ma totino o le All Blacks.
Ta’ua i le lipoti se faamatalaga a le Ofisa Sili o le NZ Rugby Mark Robinson e faapea e le fia faataitai le latou faalapotopotoga i le faiga o loo faia nei e Aferika i Saute ma Ausetalia lea o loo faataga ai tama taaalo mai fafo atu e fai ma sui o le Wallabies ma le Springboks.
O le faamautuina mai la e le NZ Rugby o lea faamatalaga o lona uiga o le a faafaigata ai foi ona faataunuu nisi o ni finagalo faaalia e pei o le faiaoga o le a iai o le All Blacks o Scott Robertson lea sa ia faaalia i le masina talu ai e tāua tele le mataupu lea i le ono fili mai o alii taaalo o loo faamautu i atunuu i fafo mo le ‘au a le atunuu.
O lona uiga o le a lē ono mafai ona valaau ai i nisi alii taaalo iloga o le All Blacks ua faamautu nei i Iapani e pei o Richie Mounga, Aaron Smith, Beauden Barrett ma Brodie Retallick.
