E ui o loo tālia e le faipule o Vaimauga 2 le taimi e oo atu ai le faamaoniga o lona lē toe avea ma ta’ita’ifono o le komiti o le fono faavae a lona itumalo aua galuega o le atinae o tagata o nuu ma afioaga o Vaimauga 2 i le poloketi o le miliona, ae ua fa’aalia e le tofi o le itumalo le tōfā Lenata’i Victor Tamapua, e leai se isi mea na te mafai, ona o lea ua faailoa le finagalo o le Palemia e na o le to’alua sui faipule o le faafaletui o le latou pātī faaupufai e puipuia aiā tatau a tagata ua filifilia i tofiga taitaifono.
O le Aso Gafua asau e toe amata ai galuega a fono faavae uma o itumalo faapalota e 51, ma ua faailoa e le sui faipule o Vaimauga 2, o le a faatino ona tiute o le faipule e lagolago i galuega uma o le atinae o lona itumalo.
O le feiloaiga a le ta’ita’i o le Malo ma tusitala a o le’i ma’ea galuega o le tausaga na tea ne’i, na ia faailoa ai ua na o faipule o Vaimauga 4 ma Safata 2 sui o le vaega faaupufai e puipuia aiā tatau a tagata na talosaga i tofi ta’ita’ifono ma ua talia e le komiti na nafa ma faatalanoaga o ia tōfiga.
I le talanoaga ma le tōfā Lenata’i Victor Tamapua i le Aso Lulu o lenei vaiaso, sa ia faailoa ai e alofa i faipule o le latou pātī o le taimi muamua lenei ua pale ai i tofi o a latou itumalo ona o le a le maua le avanoa e sē’ei ai i tofiga taitaifono, ae mo ia o lana faafetai ona sa ia ta’ita’i le poloketi a le Malo i le paea’iga talu ai a le Palemene lea na amata faatino ai le faamatu’u atu o le miliona tālā mo galuega o le atinae o itumalo faapalota uma o le atunuu.
Fa’aalia e le sui faipule sa talosaga i le tofiga ta’ita’ifono ma e to’atolu sui o le komiti na faia le faatalanoaga poo le interview.
