O lea ua faailoa e le Minisita o Tupe o loo iai ma le vaaia o le Faalapotopotoga o le faaputuga tupe o le lumanai manuia o tagata, le NPF le 2 tesimale 4 pasene o le tului o le a maua e tagata faisaofaga uma o le faalapotopotoga, lea ua faatulaga e faatoa tala i tua i le masina o Ianuari o le tausaga fou 2024, e fetaui lelei ma tapenaga o le toe a’e o aoga a le fanau.

I le saunoaga a le Minisita o Tupe le afioga Lautimu’ia Uelese Vaai i le faataatiaina o le tala faaopoopo muamua o le tupe mo le tausaga faaletupe o loo faagasolo i le taimi nei, na taualuga ai i lona faailoa o le tului lea o loo faatalitali iai le aufaisaofaga.

E tusa ma le 24 miliona 76 afe ma le 668 tala o le a faaalu ai e le NPF i le totogiina o le 2 tesimale 4 pasene o le tului.