Lealailepule Rimoni Aiafi

Tuli le sui faipule ina ua soli Tulafono Tumau o le Maota.

31 Ianuari,2022

Tusia : Maina Vai

Na tuli i fafo ma le Palemene le sui faipule o Faleata Numera 3 ia Lealailepule Rimoni Aiafi ina ua ia solia tulafono tumau o le Palemene o Samoa.

O le polokalame na faia e le sui ua faamalolo ma le leitiō o le Maota o Samoa Viiga o le Atua i le vaiaso ua tuanai ai lea o loo ia faamatalaina ai le mataupu faatatau i le ripoti a le Fono Aoao Faitulafono o Samoa e faatatau i tulafono na pasia ma masalomia e eseese tulafono na pasia ma tulafono na sainia e le Ao Mamalu o le Malo. E le gata i lea a’o le mataupu faatatau i sui usufono faaopoopo o le Palemene. 

Na faailoa e le fofoga fetalai…”E le faatagaina ona saunoa se sui usufono ini mataupu o loo i luma o le Faamasinoga…leaga e ono faaleagaina ai aiā tatau a vaega o loo aafia ai i ia mataupu”

” E le tatau foi ona faia ni faasalalauga faalauaitele e fesootai i mataupu o taualumaga a le Palemene e tuuaia ai le Fofoga Fetalai ma faaiuga a le Palemene”

Na faailoa e le Fofoga Fetalai sa ia faaali manino i le fono o le Aso 18 o Ianuari 2022 mafuaaga ona o le lē mautonu o le atunuu poo fea le sa’o i tulafono nei ma faailoa manino ai tulafono tumau e tapu ona faasalalau faalauaitele nei mataupu  seia o’o atu iai galuega a le Palemene ma talanoaina ai.

Sa faatulai atu le lafo e le Minisita o Fesootaiga ma faamatalaga Televavae Faatekonolosi Faaonapo nei ia Toelupe Poumulinuku Onesemo ina ia talia le faasilasilaga a le nofoa ona ua aafia le vaega 65(4) ma le 92 ao se vaega o le vaega e 4 o  tulafono tumau o le maota.

O nisi o ia faasalalauga a le sui o loo tuuaia ai le Fofoga Fetalai aemaise ua ese lana folasaga i le ripoti na faia i le maota ma le faasalalauga a le sui usufono.

Saunoa le Fofoga Fetalai…” Na pau ia o mafuaaga na aumai ai le ripoti o le suesuega lea i le maota peitai o faasalalauga sese ua faaoloataua ai le atunuu e faapea o se gaioiga na faia e le FAST ina ia tuuaia ai le HRPP”

O le ala lea na faatulai ese ai le sui faipule o Faleata Numera3 ma faamalolo ai mo 24 itula. Sa tulai atu Lealailepule mo se avanoa e faaali ai sona manatu peitai e lei talia e le Fofoga Fetalai.

I lana faatalanoaga ma le media mulimuli ane ai sa taua ai e Lealailepule…..”E leai se manatu e faamamasania le tulaga o le nofoa ae o lona manatu o le lafo na faatu o se mea ua leva lava ona fafau”. Na faapea mai foi le sui o Faleata Numera 3 o le a manino tagata uma pe a tolaulau lea ripoti e leai se mea o taua na faia e le malo ua tuanai….o lana vaai lea i le faaiuga ua iai i le ripoti.

Sa ia faailoa foi o se faiga lenei e aveese ai o ia mai lana lauga na taumafai atu e faaali le finagalo o lona itumalo i le tala o le tupe….ona e fai si tele o mea sa ia fia tautala iai e aofia ai ma le faamuamua o puipuiga o le koviti o loo iai nei. E ui i ia lafoga ae sa ia faamalūlū lava i le Fofoga Fetalai.

Scroll to Top

Keep uptodate with Radio Samoa activity & promotion

* indicates required