O le asō lea ua fuafua e tulaueleele ai i Niu Ioka i Amerika le tamaitai Palemia o Niu Sila, Jacinda Ardern a o lumanai ai le aso e tasi o le a faagasolo ai fuafuaga o lana faigamalaga i le malo tele mo le faamoemoe e faaosofia le toatele o tagata Amerika e asiasi mai i Niu Sila nei.
E le o mautinoa i le taimi nei pe ua faamautuina se feiloaiga a le tamaitai Palemia ma le Peresetene o Amerika, Joe Biden i le faaiuga o lana faigamalaga ae o le amataga o le faigamalaga o tulaga faapisinisi lava ae lē o le faapolokiki.
O nisi vaega o lana faigamalaga i Amerika e aofia ai le avea ma malo faaaloalogia i le Stephen Colbert, the late show atoa ai ma fonotaga ma taitai faapisinisi o Niu Ioka ma le feiloaiga ma le failautusi aoao o Malo Aufaatasi, Antonio Gutteres.
O se saunoaga a le Palemia ua lipotia i le ZB ua ta’ua ai e faigofie lava le feau o loo malaga ma iai i atunuu mamao, ua tatala Niu Sila mo pisinisi, na ia ta’ua foi o isi atunuu o loo taumafai ia ofi atu i le maketi a Amerika ma o loo ia fia faamautinoa o Niu Sila le isi atunuu e muamu silasila iai le aufaipisinisi i Amerika, faapea tulisi ma tagata faigaluega e iai tomai e asiasi mai iai.
