O le lata i le lua vaiaso e lei faaaogaina le malaevaalele i Fagalii ua mae’a ona toe tatala, na fesiligia ai le Ofisa Sili o pulega o malaevaalele i le mafuaaga.
Ina ua maua se feiloaiga ma le alii pule sili le susuga Fui Tupa’i Simanu na ia faailoa ai, o loo iai nisi o galuega e le tele o loo tau faamae’a e pei o se alavai i autafa o le auala e taunuu iai vaalele o loo tanu, ma le pou o fesootaiga a le Digicel o loo i se vaega o le nuu o Vaivase tasi, e fia aveesea pe faaitiitia i lalo le umi o le pou e mafua ona o loo iai atugaluga i le itu i le saogalemu.
O le pou o fesootaiga lea e pei ona faailoa e le Ofisa Sili, e lei iai muamua i le taimi sa faaaoga ai Fagalii peitai ina ua tapunia i le tausaga e 2019, o le tausaga na sosoo ai 2020 na fausia ma faatu ai loa le pou lea o fesootaiga.
O sailiiliga na toe faia i le saogalemu o le malaevaalele atoa, ua faaalia e Fui e le o afaina ai le pou o fesootaiga, peitai o loo iai lava atugaluga ma popolega, le mafuaaga lea o se feiloaiga ma faia i le vaiaso nei ma le kamupani telefoni o le Digicel e soalaupule se gaioiga talafeagai e faatino, poo le aveese poo le faapuupuu o le pou.
O le taimi nei foi e pei ona faailoa e le Ofisa Sili, o loo soalaupule lelei e le Samoa Airways ana malaga i le toe fetuunai lea, e le gata o taimi o malaga, ae o le tau poo le totogi o pasese.
Ua faailoa foi e le Ofisa Sili o loo faia aoaoga a pailate mo le toe afea o Fagalii ma a mae’a uma ia vaega o loo totoe, ona mautu lelei lea o le toe faaaogaina o Fagalii e vaalele laiti Twin Otters o le Samoa Airways ma le auaunaga a le Talofa Airways.
