O le asō a o lumana’i ai le Kerisimasi o le tausaga nei lea o loo faatalitali uma iai le atunuu o Tonga e iloa ai lo latou Palemia fou ina ua faamavae le Palemia sa iai o Huakavameliku Siaosi Sovaleni i le aso 9 o le masina nei.
O le asō lea o le a faia ai le palota ae sa fesiligia le Leitio faavaomalo a Niu Sila se tasi o tusitala sinia i le Pasefika ma Tonga, Kalafi Moala poo ai se isi o manatu le to’atele o le a malo i lea palota.
Na faailoa e Moala o le Itu Agai o loo faatū ane Aisake Eke ma e iai foi isi sui o loo faatū mai e isi e aofia ai ma Dr Viliami Latu o loo faatū mai e isi.
Na ta’ua e le alii tusitala i lea faatalanoaga e foliga o se tasi tulaga o loo maitauina poo ai lava o le a filifilia e avea ma Palemia ma le ituaiga malo o le a tula’i mai, e lē foia ai lava le faafitauli i Tonga o le lē mafai ona galulue faatasi o le Aigatupu ma le Palemia.
O lona uiga e tusa pe suia le Palemia o le a tumau pea le Aigatupu e faatonutonuina mea ae lē o le malo, o se mataupu tele lea ma e lē o iai se faamatalaga i lea tulaga.
Puna o Faamatalaga: https://www.rnz.co.nz/international/pacific-news/537255/will-it-be-eke-latu-or-someone-else-taking-the-top-job-in-tonga
