Ua mae’a ona faatino le ta’otoga o si alii taalo mai Tonga o Eli Katoa lea na aafia i le taaloga talu ai a le Mate Ma’a Tonga ma le Kiwi a Niu Sila, o se faamatalaga lea mai lana kalapu i Ausetalia.
Ta’ua i lipoti a le RNZ na faaauau ona taalo Katoa i le taaloga i Eden Park e ui sa feto’ai ulu ma se tasi o lana ‘au a o faia warmups o le taaloga.
O lipoti la ua ta’ua ai ua faasolo manuia le alii taalo ina ua mae’a le ta’otoga sa faia.
O loo faailoa i le RNZ le faamatalaga mai le faia’oga o le ‘au a Tonga, Kristian Woolf e faapea sa faatino e foma’i a le ‘au gaioiga uma e pei ona mana’omia ma o lona manatu e leai se tulaga e popole ai i le faatinoina o gaioiga ma fuafuaga sa faia a le ‘au.
O loo ta’ua foi i le leitio faavaomalo le faailoa ane o se fe’au mai ia Katoa i le falema’i e faafetaia ai tagata uma na momoli atu alofa’aga ma talosaga mo ia a o iai i togafitiga.
O nisi finagalo faaalia i upega tafa’ilagi ma le social media ua faailoa ai, sa lē tatau ona faataalo Katoa ona o aafiaga na iai i le taimi o toleniga auā e lē taumate e sili atu ona ogaoga ni aafiaga e ono oo iai pe ana toe aafia i nisi pu’e i le taimi o le taaloga.
Puna o Faamatalaga: https://www.rnz.co.nz/news/sport/577662/tonga-rugby-league-star-eli-katoa-has-surgery-after-suffering-seizure-activity-during-kiwis-test-match
