Ua savali i le lua masina talu mai Fepuari o aafia pea le auaunaga a le eletise i ni faaletonu ma mafua ai ona faasoasoa i le taimi nei mo le motu atoa o Upolu.
Talu mai lea taimi o le Aso Gafua o le vaiaso nei na faato’ā saunoa faalaua’itele ai le ta’ita’i o le Malo i le tamaitai Palemia, ma faailoa i le atunuu mafua’aga e tolu o le faaletonu o le eletise, e ese mai i le finagalo o le Minisita e fitoitonu ma le faalapotopotoga o le malosi faaeletise ina ua faato’ā tula’i mai le faaletonu.
Ua faaalia e le Palemia le afioga Fiame Naomi Mataafa e tolu mafua’aga o le faaletonu, muamua o le faaletonu o laina malolosi o le eletise i lalo o le eleele, o loo ta’oto mai le afi eletise i Fiaga aga’i atu i le faleafi i Fuluasou, lea na amata ai ona motusia le eletise i le motu atoa o Upolu i le Aso Sa 23 o Fepuari.
O le lona lua o mafua’aga, o uiga leaga o le tau i le aso 9 o Mati na faaleaga ai pou moli ma laina eletise malolosi i le auala, ma mafulifuli ai ma laau i luga o laina ma mafua ai ona toe motusia lea auaunaga i le motu atoa o Upolu.
O le mafua’aga lona tolu, o le faaletonu o afi o loo gaosia le eletise, e pei ona sa faaletonu ai le afi suāuu kiso i Fiaga e faapea o le totoga e ta’ua o le piston lea e 10 i le 12 masina e tālia ai lea totoga e aumai mai fafo.
O le afi numela 7 i Tanugamanono o lona totoga e ta’ua o le turbocharger ua faaletonu ma e 4 vaiaso e faatali ai lea totoga mai fafo, i le ma le afi numela 1 e gaosia le eletise mai le suavai i le faleafi i Ta’elefaga i Fagaloa, ua faaletonu lona totoga o le bearing.
E tolu masina e faia ai galuega mo le faaleleia o lea vaega o le afi ua faaletonu.
O ia faaletonu ua faailoa e le ta’ita’i o le malo ua aveesea ai le 10 mekauati o le eletise sa masani ona siitia ai lea auaunaga, ma o le mafua’aga tele lea o le faasoasoa loa o le eletise.
Le afioga le tamaitai Palemia, Fiame Naomi Mataafa.
