O le amataga o le masina lenei o Me na momoli ai le sui tauva faaolioli mo le nofoa o le itumalo o Satupa’itea i le vaega faaupufai o le Faatuatua i le Atua Samoa ua Tasi.

O lea sui faaolioli o le tofa Asiata Tuasivi Setu, o se tamalii o loo galue nei o se tasi o Faamasino o le Faamasinoga o Fanua ma Suafa, ma o se tasi o Pelesetene Lagolago.

O le masina lava lenei o Me e pei ona faailoa i upega tafa’ilagi a lea vaega faaupufai na momoli ai foi le sui tauva faaolioli o le itumalo faapalota o Vaa o Fonoti o le afioga Fuimaono Tui Vaitolo Ofoia, ma le sui tauva faaolioli mo le nofoa o le itumalo faapalota o Sagaga 2, o le tofa Fata Ryan Schuster ma o lea tamalii sa tauva foi mo le fu’a a le Faatuatua i le Atua Samoa ua Tasi i le palota tele o le tausaga 2021 ae e le’i manuia.

O nisi o itumalo palota ua mae’a ona momoli o latou sui tauva i le Faatuatua i le Atua Samoa ua Tasi, o Vaisigano 2, o Safata 2, o Aana Alofi 4, ma Vaimauga 1.

O le vaega faaupufai e puipuia aiātatau a tagata ua faailoa e lo latou ta’ita’i i le feiloa’iga ma tusitala i le Aso Tofi nei, o le masani a le H.R.P.P. e faato’ā momoli ma faailoa o latou sui tauva i le toe ono masina a o lumana’i le aso o le isi palota tele. 

Le susuga Tuilaepa L Sailele Malielegaoi o le ta’ita’i o le vaega faaupufai e puipuia aiātatau a tagata.