O le Aso Faraile o lenei vaiaso o le a faamuta ai le lesitala o ni Fautasi e faaulu atu, mo tuuga fautasi mo le polokalame e taualuga ai le faamanatuina o le 60 tausaga o le tutoatasi, lea ua fuafua mo le masina o Me.
E tai afe tala le lesitala o Sa e fia auai, peitai e oo mai i le taimi nei e na o le tolu lava fautasi ua mautinoa ua lesitala, ae sa tatala pea le avanoa seia oo ina tapunia lesitala i le faaiuga o lenei vaiaso.
Ua faailoa e le Komesina o leoleo o le taitaifono o le soa komiti o tuuga vaa, e 10 afe tala le tupe ua ioeina mai e le komiti tele e faamatuu i kapeteni ma auvaa e faaleleia ai vaega ua faaletonu i o latou Sa, ae o lea seleni e lei faamautuina se taimi e faamatuu atu ai.
E iai le talitonuga e faatoa mautu lea tulaga pe a mae’a le taimi e lesitala ai Sa, ona iloa ai lea pe toe iai nisi fautasi e faaopoopo i le tolu ua mautinoa.
O le tausaga ua mavae sa fuafua le 2 afe tala e faaleleia ai fautasi ua faaletonu, ae o lea ua suia nei i le 10 afe tala.
O le Aso Faraile 12 o Me i le ta o le 12 i le aoauli ua faatulaga e le komiti e faia ai tuuga fautasi.
